Mövsümün sonuna 8 tur qalmış premyer-liqa klubları yığmanın yoxlama oyunlarına görə 2021/22 “futbol ili”ndə son “böyük tənəffüsə yollandı”.

Kimin üçünsə bu fasilə uğurlu, kimin üçünsə uğursuz olacaq. Bəs görəsən, təxminən iki həftə sürəcək “tənəffüs”dən sonra finiş xəttinin biraddımlığında şanslar necədi? Hansı komandalar mükafatçılar sırasında ola, kimlər üzümüzə gələn yay avrokuboklara bilet sifariş edə bilər? Bu yazıda qeyd etdiyimiz suala cavab tapmağa, şansları dəyərləndirməyə çalışacağıq.

Çempion bəllidi, mükafatçılar kim olacaq?

Ardıcıl çempionluqdan sonra ötən mövsüm liderliyi “Neftçi”yə təhvil verən “Qarabağ” cari “futbol ili”ndə fırtına kimi əsir. Mövsümlərarası fasilədə heyətini yetərincə gücləndirən ağdamlılar hazırda bir oyun az keçirməklə turnir cədvəlinin ilk pilləsində qərarlaşıb. Ən yaxın izləyicisi “Neftçi”ni 9 xal qabaqlayan “köhlən atlar”ın qalan 8 qarşılaşmada büdrəyəcəyi, “ağ-qaralar”ın onlara çatmağına imkan verəcəyi inandırıcı görünmür. Son çempionun baş məşqçisi Samir Abasov belə mətbuata açıqlamalarında hazırkı vəziyyətdə Qurban Qurbanovun çalışdırıdığı komandaya “əlcək atmağın” qeyri-mümkün olduğunu bildirib. 20-ci turun “Zirə” – “Qarabağ” matçında qeydə alınan nəticə (0:3) də ağdamlıların bugünkü performansının göstəricisi idi. Hazırda 4-cü pillədə qərarlaşan “Qəbələ” isə “Qarabağ”a daha böyük hesabla (1:5) yenilib. Geridə qalan turlarda Qurbanovun yetirmələri rəqib qapılarından 41 top keçirdiyi halda, özləri cəmi 10 dəfə məyus olublar ki, bu da həm komandanın hücum xəttinin gücünü, həm də müdafiəsinin etibarlılığını göstərir. Əlahəzrət statistikanı da nəzərə alsaq, “Qarabağ”ın mayda 9-cu çempionluğunu bayram edəcəyini güman etmək olar.

O ki qaldı mövsümün sonunda 2-3-cü pillələrdə hansı komandaların qərarlaşacağına, böyük ehtimalla bu cəbhədə əsas mübarizə “Neftçi” ilə “Zirə” arasında gedəcək. 3-cü dövrənin sonuna bir tur qalmış son çempion “qartallar”ı 2 xal qabaqlamaqla ikinci yerdə qərarlaşıb. Ancaq Rəşad Sadıqovun komandasının son turlarda sərgilədiyi oyunu nəzərə alsaq, qəsəbə təmsilçisinin də “futbol ili”ni vitse-çempion kimi başa vurmaq şansının olduğunu vurğulaya bilərik. Böyük ölçüdə bu suala artıq 21-ci turda aydınlıq gələ bilər. Aprelin 3-də “ağ-qaralar” “qartallar”ı qəbul edəcək. Abasovun çalışdırdığı komanda “Bakcell Arena”dakı görüşdən qalib ayrılacağı təqdirdə xal fərqini 5-ə çatdıra, bununla da 4-cü dövrəyə bir qədər arxayın yollana bilər.

Avrokubok qatarının sərnişinləri

Üçüncü dövrənin son turu ərəfəsində bu yay avrokuboklara yollanacaq 4 klubdan üçünün adı, demək olar ki, məlumdu. Yuxarıda qeyd etdiyimiz kimi, “Qarabağ”ın Çempionlar Liqasında ölkəmizi təmsil edəcəyi heç kimdə şübhə doğurmur. Konfrans Liqasında çıxış etməli olan “üçlük”dən ikisinin - “Neftçi” və “Zirə” olacağı da aydındı. Düzdü, nəzəri cəhətdən son pillədə qərarlaşan “Səbail”in də hələ şansı qalıb. Ancaq yaşananlara real yanaşsaq, ölkənin ən köklü klubunun və Bakıətrafı qəsəbə təmsilçisinin belə şansı əldən verəcəyi inandırıcı görünmür. Qalır 4-cü təmsilçinin adına ki, bu vakansiyaya hazırda iki kollektiv namizəddi – “Qəbələ” və “Sabah”. Düzdü, bu gün üçün “qırmızı-qaralar” tunir cədvəlində 4-cü pillədə qərarlaşıb və “tələbələr”dən 7 xal öndədi. Ancaq qarşıda 8 oyun həftəsinin qaldığını və Murad Musayevin “transfer pəncərəsi”nin bağlanmasına baxmayaraq, demək olar, hər turdan sonra heyəti gücləndirdiyini nəzərə alsaq, Elmar Baxşıyevin komandasının bu mübarizədən heç də asanlıqla qalib ayrılacağını söyləmək olmaz. “Qəbələ” cari mövsümdə hər nə qədər baxımlı oyun sərgiləyib, azarkeşlərin və futbol camiəsinin rəğbətini qazansa da, maliyyə imkanlarının məhdudluğu səbəbindən ehtiyat oyunçular skamyasının qısalığı finişə doğru özünü istər-istəməz göstərir və göstərəcək. Elmar bəydən fərqli Murad Musayevin sərəncamında daha çox futbolçu var və rotasiya baxımından rusiyalı mütəxəssis daha geniş imkanlara malikdi. Bir sözlə, avrokuboklara yollanacaq 4-cü kollektiv “Qəbələ” və “Sabah”dan biri olacaq. Onu da qeyd edək ki, son dövrədə bölgə təmsilçisi “tələbələr”i öz meydanında qəbul edəcək.

Kubok görüşləri nə vəd edir?

4-cü dövrədə premyer-liqa matçları ilə yanaşı, futbolsevərləri ölkə kubokunda gərgin qarşılaşmalar gözləyir. “Qarabağ”ın çempionluq yarışmasından qalib ayrılacağı bəllidi. Yarımfinalda ağdamlıların rəqibi “Qəbələ”di ki, bölgə təmsilçisinə cari mövsümdəki performansına görə hər nə qədər tərif yağdırsaq da, etiraf etmək lazımdı ki, Baxşıyevin komandası bu gün üçün “köhlən atlar”a müqavimət göstərəcək səviyyədə deyil. Tərəflər arasında 2021/22 “futbol ili”ndə premyer-liqada baş tutan 3 görüşdən ikisindən ağdamlılar qalib ayrılıb, Qəbələdə keçirilən görüş isə heç-heçə başa çatıb. “Zirə” – “Neftçi” yarımfinalı barədə indidən proqnoz vermək düzgün olmaz. Turnir cədvəlində qonşu pillələrdə qərarlaşan komandaların kubok oyunlarının da maraqlı idman mübarizəsi şəraitində keçəcəyini güman etmək mümkündü. Ötən mövsüm baş məşqçi kimi çempionluq sevinci yaşayan Samir Abasov bu dəfə “qızıl”dan əlini üzdüyündən “futbol ili”ni titulla başa vurmaq üçün yetirmələrindən kubok görüşlərinə xüsusi yanaşma tələb edəcək. Heç şübhəsiz, Rəşad Sadıqov da məşqçi kimi titul həsrətindədi. Ölkə kubokunda şansları dəyərləndirdikdə, yenə “Qəbələ”nin şansının daha az olduğunu görmək mümkündü. Bu da, heç şübhəsiz, “Sabah”ın işinə yarayır və klub rəhbərliyi, məşqçilər korpusu və futbolçular da yaxşı başa düşür ki, bütün bunların fonunda qitəmiqyaslı turnirlərə vəsiqə hələ əldən getməyib.

Bombardir olub Avropaya yollanmaq şansı

Ötən mövsümün bombardiri, 19 qolla çempionatın ən sərrast futbolçusu adını qazanan Namik Ələskərovun və ondan 1 top az vurmaqla ikinci pillədə qərarlaşan Mahir Emrelinin mövsümlərarası fasilədə daha yaxşı şərtlər altında ölkə xaricinə yollanması hücumameyilli futbolçular üçün əsl motivasiya mənbəyi oldu. Premyer-liqada çıxış edən forvardlar da anladılar ki, Azərbaycan çempionatını izləyən skautlar və klublar var. Burda fərqlənməklə səviyyəcə daha üstün birinciliklərə yollanmaq və sərfəli şərtlərlə müqavilə bağlamaq mümkündü. Davam edən mövsümdə bombardirlik yarışında ilk pillədə “Zirə”nin və Gürcüstan yığmasının üzvü Davit Volkov qərarlaşıb. “Qartallar”ın forvardı 10 qolla hələ ki hamıya yuxarıdan aşağı baxır. Onun ən yaxın izləyiciləri “Qarabağ”ın futbolçuları Abdulla Zubirlə Filip Ozobiçdi ki, hər birinin hesabında 8 qol var. “Sabah”ın üzvü Coy-Lens Mikels isə gürcüdən 3 top geri qalır. Davitin göstəricini heç də aşağı dəyərləndirmək olmaz. Qəsəbə təmsilçisinin “18 nömrə”si 20 görüşün hamısında forma geymək şansı qazanıb və orta məhsuldarlığı 0,5-ə bərabərdi. Təsadüfi deyil ki, artıq indidən Volkovun yayda Polşa klublarından birinə keçəcəyi haqda xəbərlər yayılıb. Düzdü, bu gedişlə Davitin Namikin ötənilki göstəricisini təkrarlayacağı və ya keçəcəyi inandırıcı görünmür. Ancaq qarşıdakı 8 görüşdə statistikanı, orta məhsuldarlığı yüksəltməsi mümkündü. Ozobiçlə Zubirin də fərqlənmək, Volkova çatmaq və ötmək ehtimalı yüksəkdi. “Qarabağ”ın son görüşlərdəki məhsuldarlığını nəzərə aldıqda hər iki futbolçu barədə bunu söyləyə bilərik.

RƏŞAD