"Turan Manafovun bu şərtlər altında "Olimpiakos"da oynaması real görünmür" - MENECER DETALLARI AÇIQLADI
Qış fasiləsində Yunanıstanın ikinci liqasında mübarizə aparan “Olimpiakos”a keçən Turan Manafovun klubu ilə problemləri yaranıb.
Futbolçu bu haqda “Football-plus.az” saytına açıqlama verib. Detalları öyrənmək üçün futbolçunun meneceri İlkin Alıyevlə əlaqə saxladıq:
"Klubda maliyyə problemi var. Futbolçuların heç birinin ödənişləri olmayıb. Bu da artıq böyük problemlərə gətirib. Yunanıstanda hər şeyin qiyməti yüksəkdi. Bir həftə əvvəl "Olimpiakos"a rəsmi müraciət etmişik. Onlardan bu problemin həllini istəmişik. Klub rəsmi cavab verməyib bizə. Ancaq danışıq olub. İstəyirik məsələni dostca həll edək. Çünki müqavilənin bitməsinə bir ay qalıb. Mayda çempionat bitir. Lakin bu günə qədər heç bir irəliləyiş yoxdu. Futbolçu da, mən də erkən dönməyi istəmirik. Əlimizdən gələni edirik ki, dostca həll olunsun. Amma irəliləyiş olmasa, lazımi addım atacağıq. Hələ ki gözləmə mövqeyindəyik. Bu problem martın əvvəlində çıxdı. Bu gün-sabah fikrimizi dəqiqləşdirəcəyik. Turan "Səbail"ə məxsusdu. Müqavilə şərtlərinin qarşılanmamasına görə yəqin ki, klub da etirazını bildirəcək. Mən Volos təmsilçisinə rəsmi müraciət edəndə, bu barədə "Səbail"ə məlumat vermişdim. Onlara belə problem olduğunu dedim. İki gün öncə də "Səbail"ə bildirdim ki, bu gedişlə UEFA-ya müraciət edəcəyik. Futbolçu sizə məxsus olduğu üçün siz də rəsmi müraciət edə bilərsiz FİFA-ya. Çünki "Olimpiakos" və "Səbail" arasında olan müqavilə şərtlərinə Yunanıstan klubu əməl etmir. İstəyərlər, müraciət edərlər, istəməzlər, etməzlər. Mən, sadəcə, onlara da yazıb məlumat vermişəm".
Turanın meneceri sözlərinə bunları da əlavə etdi:
"Bizim əsas istəyimiz dostca bu işi həll etməkdi. İstəmirik məhkəmə, federasiyaya müraciət olsun. Klubun bu işdə göstərəcəyi mövqe önəmlidi. İrəliləyiş olmasa, Yunanıstan Futbol Federasiyasına, daha sonra UEFA-ya müraciət edəcəyik. Turan özünü orda yüksək səviyyədə göstərdiyi üçün klubun bizə qarşı heç bir bəhanəsi yoxdu. Maaş böyük problemdi, verilmir. Bu şərtlər altında isə Turanın orda oynaması real görünmür. Öncə klubdan məşqçi ayrıldı. Turanın keçidini istəyən o idi. Yeni məşqçi gəldi. Daha sonra COVİD-19, zədəsinin olması - bunlar da futbolçunun motivasiyasına təsir edir”.
GÜNAY VƏLİYEVA
