Dünya necə də qəribədi. Daha doğrusu, Putinin işğal planının bir adamın uzun illər yaşıl meydanda can qoyduğu fədakarlığı heçə endirdiyini, dəyərlərini sarsıtdığını görmək üçün bu nümunəyə baxmaq kifayətdi.

Vaxtilə SSRİ yığmasının qırmızı formasında özünü göstərən Vladimir Bessonov Rusiyanı hərbi hücumuna məruz qalan Ukraynanın müdafiəsi üçün silaha sarılıb. 64 yaşlı futbol veteranı paytaxt Kiyevi ruslardan qoruyanların sırasına qoşulub. Qeyd edək ki, onun kimi Ukraynanın bir çox tanınmış idmançıları ölkəsinin müdafiəsi uğrunda döyüşlərə qoşulub.

Bessonov karyerasını əsasən Kiyev “Dinamo”sunda (1976-90) keçirib və futbolçu həyatını Hayfa “Makkabi”sində (1990-91) başa vurub. Sabiq SSRİ yığmasında 13 il (1977-90) çıxış edib. Bu komandada 79 oyuna 4 qol vurub. O, “Dinamo” ilə 6 dəfə SSRİ çempionu, 4 dəfə SSRİ kubokunun və bir dəfə Kuboklar Kubokunun qalibi olub.