Mark Overmars Belçikada özünə yeni iş tapıb.

O, bundan sonra “Antverpen”in texniki direktoru vəzifəsini icra edəcək. Niderlandlı funksioner fevralda “Ayaks”ın idman direktoru postundan rüsvayçılıqla qovulmuşdu. Klubun mətbuat xidmətinin məlumatında Niderland yığmasının keçmiş yarımmüdafiəçisinin qadın həmkarlarına uzun müddət uyğun olmayan mesajlar göndərdiyi üçün işini itirdiyi bildirilmişdi. Amsterdamda çıxan “Het Parool” gündəlik qəzeti istefanın əsas səbəbini öyrənə bilmişdi. Bu mənbə Overmarsın klubun qadın əməkdaşlarından birinə cinsiyyət orqanının şəklini göndərdiyini iddia etmişdi. Buna görə rəhbərlik 2012-ci ildən “Ayaks”ın strukturunda işləyən 48 yaşlı mütəxəssisə dərhal qapını göstərmişdi. Overmars karyerasındakı “qara səhifə”ni tezliklə arxada qoymaq istəyir: “Bu səhifəni qısa zamanda çevirmək istəyirəm. Bunu yeni iş yerimdə etməyə çalışacağam. “Ayaks”dan getmək məyusedici oldu. Ancaq irəli hərəkət etmək lazımdı. “Antverpen”də bu məsələ müzakirə edilməyib. Amma söz verirəm ki, “Ayaks”da baş verən hadisə burda təkrarlanmayacaq”.