“Biz də hər kəs kimi təxmin edirdik ki, martın 18-də "Keşlə" Şamaxıya gedəcək” - Rüstəm Əfsərli
"Keşlə"nin Şamaxıya köçü yubanır. Komanda martın 18-də yeni adla bölgədə ilk ev oyununu keçirməliydi.
Bununla bağlı komandanın baş məşqçisi və futbolçuları da açıqlama vermişdi. Hətta premyer-liqanın "Səbail"lə son turunun görüşündə kollektiv "Old Wolf" fanklubu ilə vidalaşmışdı. Premyer-liqanın yayın hüququna malik "CBC Sport" belə həftəlik teleproqramında növbəti görüşü "Şamaxı" - "Sumqayıt" kimi qeyd etmiş, oyunun Şamaxıda baş tutacağını açıqlamışdı. Buna baxmayaq, PFL-in rəsmi saytında "Keşlə" - "Sumqayıt" matçının "ASK Arena"da keçiriləcəyi qeyd olundu. Qurumun mətbuat katibi Aslan Şahgəldiyev isə qəzetimizə açıqlamasında Bakı klubunun Şamaxıya köç tarixinin dəqiqləşmədiyini söylədi.
Yəqin azarkeşləri ilə vidalaşan komandanın baş məşqçisi, futbolçuları, hətta yayın hüququna malik "CBC Sport" bunu özündən uydurmayıb. Klubun və PFL-in məsələ ilə bağlı mövqeyi məlum olduğundan, bu dəfə anons verən telekanalın Proqram direktoru Rüstəm Əfsərli ilə əlaqə saxladıq:
"TV proqramı rəsmi bir şey deyil. O bizim daxili yazışmamızdı. Biz də hər kəs kimi təxmin edirdik ki, martın 18-də "Keşlə" Şamaxıya gedəcək. Mətbuatda da bununla bağlı xəbərlər çıxmışdı. Alınacağı təqdirdə klubun adı "Şamaxı" olacaq, işiqlandırma sisteminə görə isə görüş saat 14.00-da başlayacaqdı. Biz də cədvəli buna əsasən yazmışıq. Bu, ictimaiyyətə açıqlanan cədvəl deyildi. Daxili yazışmamıza görə belə hazırlamışdıq. Bunu ona görə hazırlayırıq ki, bütün işçilərimiz məsələ ilə bağlı hazırlıqlı olsun. Saytımızda bununla bağlı xəbər paylaşmamışdıq. Biz onu hazırlayıb, göndəririk departamentlərə ki, hər kəs işini bilsin. PFL rəsmi şəkildə açıqlayandan sonra biz də düzəliş etdik. Bu matçları PFL ilə həmişə müzakirə edirik. "Keşlə"nın Şamaxıya köçməsi ilə bağlı aşağı-yuxarı məlumatımız da var. Çünki biz bilməliyik. Yayın hüququna malik olduğumuz üçün stadion, çəkiliş yerləri ilə maraqlanmalıyıq. Bu, bir-iki günün işi deyil. Yəni PFL ilə müzakirələr uzun müddət gedir. Martın 18-i ilə bağlı rəsmi qərar yox idi. Ümumi müzakirələr var idi. Sonra rəsmən elan olundu və biz də elə paylaşdıq".
GÜNAY VƏLİYEVA
Digər xəbərlər
