“Baltikyanı respublikalara gəlmişkən, Polşaya da getməyə qərar verdim. Varşavanı təmsil edən “Legiya”da çalışan rəhbər şəxslərlə də çox isti münasibətim var. Onlarla görüşdüm, bəzi məsələlər ətrafında çox səmərəli fikir mübadiləsi oldu. Düzdü, “Legiya” hazırda yaxşı durumda deyil, buna baxmayaraq, Varşava təmsilçisi Polşanın ən köklü klublarından biridi və bu ölkədə futbol dəbini müəyyənləşdirməyi bacarır. Rəhbərliklə görüşdən sonra klubun sabiq idman direktoru, Azərbaycan futbolunu çox yaxından izləyən, “Qarabağ”ı bəlkə də Qurban Qurbanov qədər tanıyan Radoslav Buxarski ilə görüşümüz oldu. Məhz onun sayəsində “Legiya” tək Mahir Emrelini yox, ağdamlıların başqa futbolçularını da “rənglərinə bağlamaq” istəyirdi. Buxarski dekabrda “Legiya”dan ayrılsa da, bu klubda çox böyük nüfuza malik biridi. 20 ilə yaxın orda çalışıb. Birvaxtlar məşqçi olub, sonra skaut qrupuna rəhbərlik edib. Onun ekstraklasanın başqa bir təmsilçisində idman direktoru kimi çalışmaq variantı var. Azərbaycanlı futbolçuların Polşaya transferi haqda onunla çox söhbətimiz oldu. Millidə oynayan konkret adlarla maraqlandı, ətraflı məlumat topladı. Buxarski məni “Legiya”nın çempionat oyununa dəvət etdi, bir yerdə matçı izlədik. Söhbətimizin əvvəlində qeyd etdiyim kimi, yüz dəfə “vatsap”la danışmaqdansa, üzbəüz görüşlər daha faydalıdı və inanıram ki, istər Baltikyanı ölkələrə, istərsə də Polşaya səfərimin nəticəsi yay “transfer pəncərəsi”ndə özünü göstərəcək. Sizinlə danışarkən Litvadayam. Bu ölkənin klublarının funksionerləri, üzdə olan futbol adamları ilə görüşlərimiz davam edir”.