Aqil Məmmədov meydana qayıdacağına ümid edir - AÇIQLAMA
Xəbər verdiyimiz kimi, Aqil Məmmədov Türkiyədə dizindən əməliyyat olunub.
Futbolçunun sağalıb, yenidən yaşıl meydanlara dönməsini gözlədiyimiz anda onunla bağlı üzücü xəbər aldıq. Deyilənə görə, 32 yaşlı qolkiperin karyerası bu səbəbdən təhlükə altına düşüb. Buna səbəb dizindəki problemin ciddi olmasıdı.
Xəbəri dəqiqləşdirmək üçün “Neftçi”nin qapıçısı ilə əlaqə saxladıq. Aqil Məmmədovdan hazırda özünü necə hiss etdiyini, əməliyyatdan sonra problemlə üzləşib-üzləşmədiyini və zədəsinə görə karyerasını bitirib-bitirmədiyini soruşduq:
“Bakıda əməliyyat olunmuşdum. Həmin vaxt gözləyirdik ki, hər şey yolunda gedər. Daha sonra problemin həll olunmadığı üzə çıxdı. Bundan sonra Türkiyədə yenidən əməliyyat olundum. Şükürlər olsun ki, uğurlu keçdi. Özümü yaxşı hiss edirəm. Düzdü, ara-sıra ağrılar olur. Amma bu, o qədər də təhlükləli deyil. Karyeramı bitirmək haqda hələ düşünmürəm. Hazırda dizimdəki problemin aradan qalxmasını gözləyirik. 4-5 həftədən sonra fərdi məşqlərə başlayacam. Hər şey yolunda getsə, yenidən yaşıl meydanlara qayıdacam. İnşallah, sağlamlığımda bir problem çıxmaz və karyeramı davam etdirərəm”.
İLKİN SULTANLI
