"Qarabağ"dan iki yeni transfer

“Qarabağ” iki yeni transferini rəsmiləşdirib.

"Football-plus.az" xəbər verir ki, Ağdam təmsilçisi nigeriyalı hücumçu Taofik İsmahil və almaniyalı vinger Reda Xadranı heyətinə qatıb.

Taofik İsmahil Polşanın “Qurnik” (Zabje) klubundan transfer olunub. 26 yaşlı forvardla 3 illik müqavilə imzalanıb. O, “Qarabağ”da 19 nömrəli formanı geyinəcək.

Nigeriyalı hücumçu karyerası ərzində Norveçin “Şeyd”, “Fredrikstad”, “Volorenqa”, Fransanın “Loryan”, Belçikanın “Beveren” və Polşanın “Lex” klublarında da çıxış edib. O, 2024-cü ildən “Qurnik”in formasını geyirdi.

“Qarabağ”ın digər yeni transferi isə Reda Xadradı. Fransanın “Reyms” klubundan gələn 25 yaşlı hücumameylli yarımmüdafiəçi ilə "2+1" illik müqavilə imzalanıb. Xadra komandada 10 nömrəli forma ilə çıxış edəcək.

Dortmund “Borussiya”sının yetirməsi olan futbolçu daha əvvəl “Brayton”, “Birminhem”, “Şeffild Yunayted”, “Blekbern” və “Havr”ın da formasını geyib. O, Almaniyanın U-18 və U-21 milli komandalarında da çıxış edib.

Qeyd edək ki, Reda Xadra və Taofik İsmahil “Qarabağ”ın yay transfer pəncərəsində müvafiq olaraq 9-cu və 10-cu transferləri olub. Daha əvvəl Jali Muaddib, Zakaria Savo, Samuel Lobato, Bruno Lanqa, Martin Zlomisliç, Renaldo Sefas, Bense Varkonyi və Cebrail Makreçkis komandaya qoşulublar.