Yığmamız bu gün DÇ-2026-nın seçmə mərhələsi çərçivəsində Fransanın qonağı olacaq.

Təbii ki, Parisdən qələbə ilə qayıtmaq yuxu, heç-heçə ilə qayıtmaq isə şirin xəyaldı. Yenə yekun nəticədə heyət seçiminin böyük rol oynayacağı dəqiqdi. Baş məşqçi Ayxan Abbasovun komandanı qorumaq istədiyini bilirik. Mütəxəssis bunu özü dilə gətirib. Belədə ağla çalışdırıcısının Ukraynaya qarşı matçda start heyətində hansı futbolçulara şans verdiyi və onların bu gün formada olub-olmadığı maraqlıdı. “Football-plus.az” bu məqama aydınlıq gətirməyə çalışdı.

Belə ki, Ukrayna qarşı matçda ilk “11-lik”də meydana çıxan futbolçulardan görüşün keçirildiyi sentyabrın 9-dan bəri Elvin Cəfərquliyev 271 (premyer-liqada 104, Çempionlar Liqasında 167), Bəhlul Mustafazadə 270 (premyer-liqada 90, Çempionlar Liqasında 180), Anton Krivotsyuk 270 (“Daeojon”, Koreya), Elvin Bədəlovla Qismət Alıyev 360, Şahruddin Məhəmmədəliyev 180, Emin Mahmudov 327, Abdulla Xaybulayev 47, Rüstəm Əhmədzadə 355 (hamısı premyer-liqada), Renat Dadaşov 97 dəqiqə (“Motor”, Polşa) oynayıb. Almaniyanın 2-ci bundesliqa təmsilçisi “Kayzerslautern”in futbolçusu Mahir Emreli, ümumiyyətlə, oynamayıb.

Göründüyü kimi, Mahirin milliyə çağrılmasına haqq qazandırmaq olmur. Bununla belə, Ayxan bəy nə qədər istəməsə də, heyətdə müəyyən dəyişikliklərə əl atmalıdı. Xüsusən Renat, Mahir və Abdullanın start heyətində olması durumu bir qədər də qəlizləşdirə bilər. Məsələn, Abdullanın əvəzində Toral Bayramov (premyer-liqada 166, Çempionlar Liqasında 25), Mahirin yerinə Musa Qurbanlı (premyer-liqada 161, Çempionlar Liqasında 2) oynaya bilər. Renatın meydana çıxmasına isə göz yummaq olar. Hər halda, indiki durumda mövqeyinə görə ən münasib seçim məhz Renatın özüdü.

Bəs, Ayxan Abbasov daha yaxşı formada olanlara şans verməkdən yana olacaqmı? Bunu bu gün görəcəyik.

KƏNAN BAHADIR