İtaliya çempionatında mövsümün başa çatması ilə icarə əsasında ''Kalyari''də çıxış edən ''Beşiktaş''lı forvard Semih Kılıçsoyun da aqibəti bəlli oldu. İtaliya təmsilçisi türkiyəli futbolçunun 12 milyon avroluq təzminatını ödəməmək qərarına gəlib. Yəni gənc futbolçu Türkiyəyə qayıdıb. Özü də maraqlıdı ki, Semih son turun matçını gözləmədən vətəninə dönüb. ''Kalyari'' bazar günü səfərdə ''Milan'' ilə qarşılaşdı. Kılıçsoy şəxsi işləri olduğunu bildirərək şənbə günü Türkiyəyə gəlib. ''Kalyari''nin baş məşqçisi Fabio Pizakane bunları deyib: ''Ümid edirəm ki, Semih bu mövsüm nələri yanlış etməsi mövzusu üzərində düşünərək səhvlərindən nəticə çıxaracaq. Bu təcrübənin ona böyük faydasının dəyəcəyinə inanıram. Onu oynatmağım üçün mənə heç vaxt təzyiq göstərilmədi. Əlimdə böyük bir istedadın olduğunu bilirdim. Ancaq bu istedad yeni səviyyəyə qalxması üçün başqa şeylərə ehtiyacının olduğunu da anlamalıdı. Semih üzərində çalışmalı və oyununa çox şeylər qatmalıdı''. İddialara inansaq, 20 yaşlı futbolçu karyerasını elə Avropada davam etdirmək istəyir. Meneceri hazırda ''böyük beşlik''də onun üçün klub axtarır. Semih İtaliyada mövsümi 25 oyun, 4 qol göstəriciləri ilə tamamladı. ''Beşiktaş''la 2028-ə qədər müqaviləsi olan futbolçunun transfer dəyəri 13 milyon avro civarındadı. Xatırladaq ki, Semih həm də mundialdan kənar qalıb. Vinçentso Montella onu dünya çempionatı üçün Türkiyənin hətta 35 nəfərlik geniş heyətinə də daxil etməyib.