Misli premyer-liqasının 33-cü turunda “Qarabağ” “Sumqayıt” səfərindən 3 xalla ayrıldı - 4:3.

“Football-plus.az” qonaqların baş məşqçisi Qurban Qurbanovun oyunsonrası mətbuat konfransından hesabatı təqdim edir.

- Futbolçularımı təbrik edirəm. Son oyun olsa da, hər iki komandanın oyunçuları yaxşı oyun göstərdi. Çox istəkliydilər. Bütün komandalara təşəkkür etmək istəyirəm. Yaxşı çempionat, futbola xas hər şey oldu. Hansısa açıqlamalarla sizləri narahat etmişiksə, üzürlü hesab edin. Futbol emosiya oyunudu. Bu futbolun sevilən tərəfidi. Hər halda, kim futbola aiddisə, çalışmalıyıq ki, təmkinli olaq. Azarkeşlərə təşəkkür edirəm. Hər iki azarkeş qrupumuz bütün oyunlarda bizimlə oldular. Komandam adından “çox sağ ol” deyirəm. Bütün komandalar yaxşı oyun keçirdi. Maraqlı mətbuat konfransları keçirdiz, sizə də təşəkkür edirəm. Qalır istirahət edib, növbəti mövsümə keçmək. Transferlərdən sual verəcəksiz, çox da uzatmayaq (gülür). İşlər gedir. Bu il birinci olmasaq da, yaxşı mövsüm keçirib təcrübə topladıq. Həm avrokuboklara, həm də çempionata hazırlaşacağıq.

- Elvinlə bağlı məsələ nə yerdədi? Başqa kimlər gələcək?
- Gedənlər açıqlanacaq. Gedənlər də, gələnlər də açıqlanacaq. Bizdən asılı olmayan şeylər də var. İş gedir, xəbərlər olacaq. Elvinlə bağlı transfer təklifinə açığıq, bizlə müqaviləsi var. Transfer alınmasa, növbəti qərarı sonra verəcəyik.

- Ramil Şeydayevin taleyi necə olacaq?
- Sabah qərar verəcəyik.

- Zakaria Savonun gələcəyi deyilir.
- Çox müsbət danışıqlar gedir. Alınmaq ehtimalı çoxdu.

- Bu mövsümə görə peşman olduğunuz məqam var? Sizə haqsızlıq oldu?
- Haqsızlıq barədə danışmayacam. Hakimlik tərəfdən bəlkə ola bilər. Onlar ən ağır mövsümlərini keçirdilər. Bəzi anlarda hansı qərar verəcəylərini bilmirlər. Hər yerdə müzakirə olundu. Onlara təsir edir. Onlar da gələn mövsüm üçün təcrübə topladılar. Məsuliyyətli işin altındadılar. Onlara uğurlar arzulayıram. Səbr, güc, qüvvət diləyirəm. O barədə danışmaq istəmirəm. Klubumuzun ən uğurlu ili oldu. ÇL-də bir dəfə oynamışdıq, üç rəqibə qarşı iki xal toplamışdıq. Bu dəfə 7 rəqibə qarşı 10 xal topladıq. Mərhələni adlamaq da böyük nəticə idi. Mən başqa olmaqla, psixoloji və fiziki baxımdan komanda çox yoruldu. Əvvəl üç komandaya qarşı hazırlaşırdıq, bu dəfə 8 komanda oldu. “Napoli”, “Benfika” kimi komandalar 10 xal toplaya bilmədi. Biz də təcrübə qazandıq. Fevralın sonuna kimi Avropa həyəcanı ölkədə oldu. Hər kəs bunu yaşadı. Möhtəşəm oyunlar oldu. Futbolçularıma təkliflər oldu. Mövsümdən tam razı qaldıq.

- Adınız “Beşiktaş”la hallanır.
- Hər birinə təşəkkür edirəm, “Qarabağ”la müqaviləm var.

- Bu mövsümü son illərin ən maraqlı çempionatı adlandırmaq olar?
- Olar. Dəyişikliklər oldu.

- İctimaiyyət komanda ilə bağlı haqsız fikirlər səsləndirəndə küsmürsüz?
- Özümə yox, komandaya qarşı belə fikirlər olanda üzülürəm. Azərbaycan futbolu adına da. ÇL-in qrupuna düşməyi arzulayırdıq. Daha yaxşı nəticə istəyirdik. Uşaqlar bunu bacardı. Kasıb, döyüşkən uşaqlar bunu bacardı. 7-8 ay böyük futbolu ölkədə hiss etdirdik. Filan restoranda, toyda, “Sibriz”də oyunlara monitorda baxanlar var idi. Futbola istənilən ölkədə baxırlar. Uğursuz adlandırmaq bizə nə dərəcədə yaraşar, demək çətindi. Bizim ÇL-də qələbəmiz yox idi. Bunu istəyirdik. Şükür olsun, ilk oyundan bu alındı. Böyük klubların arasında olduq. Şəhərdə, restoranda kasıb, rəhbər şəxsləri görürəm. Məndən narazılıq edənlər görməmişəm. Hamı təşəkkür edir. Futbolçulara görə üzülürəm. Kim hansı şəraitdən gəlib, nə uğur qazanıb. Millətimizin duaları idi. Ölkə üçün lazım olan qələbəni Allah bizə nəsib edib. Kluba təşəkkür edirəm. Silahsız uşaqlar döyüşlərdə qalib gəldi (gülür).

- Bu gün 6 futbolçu debüt etdi. Onlardan razı qaldız?
- Təəssüf ki, həmişə cəlb edə bilmirik. İki-üç oyunçu böyük ehtimalla çağıracağıq. Yaxşı tərəflərini göstərəcəklər.

- Avropa Liqasında final görə bilərik?
- Yaxşı arzudu (gülür). AL ÇL-in kiçik qardaşıdı. Komandanı formalaşdırmaq üçün zamana ehtiyac var. Daha istəkli yanaşacağıq. Çalışacağıq ki, maksimum irəli gedək.

MÜZƏFFƏR QULUZADƏ