“Başqa məsələlər də var və klub bunu açıqlamağı lazım bilmir” – Maksim Medvedev Elvinin sirrini öyrənib?
“Elvin Cəfərquliyev məşqlərdə daim fəal iştirak edir. Performansının aşağı düşməsini istəmir. Canla-başla çalışır. Aydın məsələdi ki, başverənlərə görə psixoloji durumu bir az qaydasında deyil. Amma bu da zamanla düzələcək məsələdi”.
Bu sözləri “Football-plus.az”a “Qarabağ”ın əvəzedici komandasının baş məşqçisi Maksim Medvedev deyib. Mütəxəssis futbolçunun əsas kollektivdən əvəzedicilərə göndərilməsindən sonra yaşananlar haqda danışıb:
“Hər futbolçu səhv edə bilər. Əsas odu ki, təcrübəsi artsın, məsələlərə daha peşəkar yanaşa bilsin. Ümid edirəm ki, bir də belə hal təkrarlanmayacaq. Bu gün həm “Qarabağ”ın, həm də yığmanın məşqçilər korpusu onunla yaxından maraqlanır. Biz də məlumatları qarşı tərəfə ötürürük. Bununla yanaşı, Elvinin özünü yaxşı hiss etməsi üçün əlimizdən gələni edirik. Hələ gəncdi, səhvlərinin olması normaldı”.
Maksim bəydən Qurban Qurbanovun Elvini bağışlayacağına inamının qalıb-qalmadığını da soruşduq:
“Mətbuatda çox söz yazılır. Bəllidi ki, yalnız intizamsızlığa görə belə cəza verilmir. Başqa məsələlər də var və klub bunu açıqlamağı lazım bilmir. Ola bilsin, azarkeşlər düşünür ki, problem yalnız intizamla bağlıdı. Bu üzdən mənzərə kənardan fərqli görünür. Ümid edirəm ki, bu mövzu həm “Qarabağ”, həm də Elvin üçün yaxşı bitəcək”.
KƏNAN BAHADIR
Digər xəbərlər
