"Kəpəz" premyer-liqanın 31-ci turunda "Sabah"ın meydanında qalib gəldi - 1:0.

"Football-plus.az" xəbər verir ki, "sarı-göylər"in baş məşqçisi Azər Bağırov oyunsonrası mətbuat konfransında jurnalistlərin suallarını cavabladı.

- "Sabah"ı çempionluq münasibətilə təbrik edirəm. İnşallah, Azərbaycanımızı Avropada yaxşı təmsil etsinlər. "Sabah" kimi komandaya qarşı meydana çıxmışdıq. Çox matçda oyunun müqəddəratını birinci hissədə həll etmişdilər. Bu gün bir az bəxtimiz gətirdi. Yusif İmanova təşəkkür edirik ki, ən yaxşı oyunlarından birini oynadı. Düşünürdük ki, "Sabah" heyətdə dəyişikliklər edəcək. Çünki 5 gündən sonra oyunları var. Şükürlər olsun ki, planlaşdırdıqlarımız baş verdi. Komandamı qələbə münasibətilə təbrik edirəm. Hər bir futbolçuya minnətdaram. Gəncədən gələn azarkeşlərə bir daha təşəkkür edirəm.

- Bir mövsümdə iki çempionu məğlub edən komandasız. Amma autsayderlərə uduzmusuz. Bunu nə ilə bağlayırsız?
- Fikir verirsizsə, heyətdə böyük dəyişikliklər edə bilmirik. Çempionatda 12-13 nəfərlə oynayırsansa, eniş də olacaq. Fiziki və psixoloji tərəfi də var. Ən pisi o idi ki, dəyişiklik edəndə oyunu gücləndirə bilmirdik. Uduzduğumuz 4 oyunda da elə oldu ki, heyətdə futbolçular yox idi. Rotasiya edəndə, birdən-birə 4-5 mövqe zəifləyir. Futbol adamları bunu başa düşürlər, amma anlaşılandı ki, azarkeşlər tam başqa cür baxırlar. Komandanın yüksəliş dövründə eniş görəndə üzülürlər.