Sinenkanın məhz zədə üzündən kənarda qalması şübhə doğurur - mətbuat katibi durumla bağlı açıqlama verdi
“İmişli”nin qapıçısı Andrey Sinenka 26-cı turda “Turan Tovuz”la görüşün 83-cü dəqiqəsində Hüseynəli Quliyevlə əvəzlənəndən bəri meydana çıxmır. Klub rəsmiləri onun son üç turda meydana çıxmamasını zədəsi ilə əlaqələndirsə də, belaruslunun başqa klublarla danışıq apardığına görə rəhbərliyin qəzəbinə tuş gəldiyini iddia edən mənbələr də var.
Yeri gəlmişkən, qapıçının meneceri Dmitri Xlebosolov qışda Belarus mediasına açıqlamasında “Qarabağ”ın 28 yaşlı kiperlə maraqlandığını da da demişdi.
Bəs hansı variant doğrudu: Sinenka zədəlidi, yoxsa başqa klublarla danışıq aparmaqla “İmişli” rəhbərliyini qəzəbləndirib? Klubun mətbuat katibi Leyla Behbudlu sualımızı cavabladı:
“Yayılan məlumatlar həqiqəti əks etdirmir. Andrey Sinenka hazırda zədəsonrası bərpa prosesini davam etdirir. Klubun tibbi heyətinin ilkin qiymətləndirməsinə əsasən, onun vəziyyəti müsbət dinamika ilə irəliləyir. Həkimlərin proqnozuna görə, “Qarabağ”la keçiriləcək qarşılaşmaya qədər hazır vəziyyətə gələ bilər. Bu müddət ərzində Hüseynəli Quliyev komanda daxilində ona verilən tapşırıqları məsuliyyətlə yerinə yetirir. Onun meydandakı sabit çıxışı isə komandanın oyun ritminin qorunmasına, ümumi tarazlığın daha yaxşı saxlanmasına müsbət təsir göstərir”.
Xatırladaq ki, belaruslu qapıçının Aran təmsilçisi ilə müqaviləsinin müddəti mövsümün sonunda başa çatacaq.
MÜZƏFFƏR QULUZADƏ
Digər xəbərlər
