"Bəli, "Neftçi" son vaxtlar oyununu xeyli yaxşılaşdırmışdı, aqressiv çıxış edirdi, qələbə qazandıqca motivasiyası artırdı. Ancaq özündən bu qədər güclü rəqiblə qarşılaşmamışdı. Belə demək mümkünsə, əsl imtahanla üzləşməmişdi. Bunlar "Qarabağ"a və "Sabah"a qarşı matçlardı. Əslində derbidəki məğlubiyyətin bir yox, bir neçə səbəbi var. "Ağ-qaralar" ilk 15 dəqiqədə rəqiblə bərabərsəviyyəli oyun sərgilədi. Hər iki komanda aqressiv çıxış edirdi. Topu qazanan kimi sürətlə önə atılmağa, boşluq axtarmağa çalışırdı. Burda "Qarabağ"ın futbolçuları təkbətək mübarizələrdən qalib ayrıldı, həlledici ötürmələr verdi. "Neftçi" bu hücumların yalnız iki-üçündə özünü yaxşı tərəfdən göstərdi, topu qaytarmağı, oyuna nəzarəti ələ keçirməyi bacardı. Bununla belə, Faraj və Varqas topu özündə çox saxladı. Hansısa anda ötürmə etməli olsalar da, bundan yayındılar. Nəticədə əlverişli imkanlar əldən çıxdı. "Qarabağ"ın oyunçuları isə həlledici məqamda ötürmələrə üstünlük verdi, topu qəbul edən futbolçu tora qovuşdurdu. Yəni 1-ci hissədə həm "Qarabağ", həm də "Neftçi" imkanlar yaratdı, ancaq qonaqlar bundan daha yaxşı yararlandı. Ağdamlıların möhtəşəm müdafiə olunduğunu düşünmürəm. Sadəcə, meydan sahiblərinin futbolçuları həm keyfiyyət, həm də oyun zəkası baxımından geridə qaldı. Təbii ki, bu da "Qarabağ"ın avrokuboklardakı zəngin təcrübəsindən qaynaqlanır. Həmin oyunlar komandaya ən kiçik fürsəti belə dəyərləndirməyi öyrədib. O cümlədən, "Neftçi"nin müdafiə xətti açıq-aşkar, həddən artıq kobud səhvlərə yol verdi. Həm də onu qeyd etmək lazımdı ki, "Qarabağ"ın hücum xəttindəki futbolçular çox üstün oynadı. Qurban Qurbanovun komandası "Neftçi"nin səhvlərindən ustalıqla bəhrələndi. Əvvəlki rəqiblər bunu edə bilmirdi. Üstəlik "Neftçi" ikinci yarıda da israrla açıq futbol sərgilədi. Hər dəfə önə keçməyə çalışanda qol buraxmaq komandanın motivasiyasını bir qədər də aşağı saldı. Yenə də buna görə "ağ-qaralar"ı başa düşmək olar. Çünki çempionat oyununda 1:3 və 1:5 hesabı arasında ciddi fərq yoxdu. Risk etdilər ki, bəlkə vəziyyəti düzəldələr".

"Düşünürəm ki, "Neftçi" birinci matçın ilk dəqiqələrində göstərdiyi aqressivliyi davam etdirməlidi. Çünki həmin məqamda bakılıların 1:5 hesablı məğlubiyyət yaşayacağı gözlənilmirdi. Amma müdafiə xəttində top itkisinə yol verilməməli, xüsusən mərkəz müdafiəçiləri “oyunu oxumalı”, rəqibin həmlələrini əvvəldən təxmin etməli, gözüaçıq olmalıdı. Çünki "Qarabağ" bu məqamda da rəqibdən üstün idi. Bu problemin öhdəsindən gəlsələr, ikinci oyunda yaxşı nəticə əldə edə bilərlər. Amma məlum məğlubiyyətin psixoloji təsirindən xilas olub-olmayacaqları hələ bəlli deyil. O başqa məsələ ki, "Neftçi"nin məşqçisi (Vitali Vernidubu nəzərdə tutur - red.) oyunsonrası mətbuat konfransında ikinci qarşılaşma haqda böyük ümidlə danışmadı. Açıq-aşkar dedi ki, "Qarabağ"ın səviyyəsinə çatmağa hələ çox vaxt var. Bu sözlər deyilirsə, ikinci oyun üçün möcüzə gözləmək olmur. 3-4 tur sonra yenidən qarşılaşsalar, bəlkə nəsə gözləmək mümkün idi, oyunçular yaşananları yaddan çıxarardı. Lakin indiki məqamda "ağ-qaralar"ın qələbə qazanacağını düşünmək çətindi. İnanmağım gəlmir ki, "Neftçi" "Qarabağ"ın cavabını versin. Ən yaxşı halda heç-heçə edə və ya daha kiçik hesabla uduza bilərlər".