"Şamaxı" Misli premyer-liqasının 29-cu turunda "Kəpəz"i məğlub etdi - 2:0.

"Football-plus.az" xəbər verir ki, bu sözləri "şirlər"in baş məşqçisi Ayxan Abbasov oyunsonrası mətbuat konfransında jurnalistlərin suallarını cavabladı.

- Bizim üçün xoş qalibiyyət oldu. Azarkeşlərimizin qarşısında çoxdandı ki, qələbə qazana bilmirdik. Bilirdik ki, onlar o qələbəni bizdən gözləyir. Maraqlı və dinamik oyun oldu. Hər iki komanda uduzmaq istəmirdi. Oyun sürətli başladı. Birinci hissədə qol epizodları oldu. İkinci hissəyə yaxşı başlamadıq. Sonradan oyunun nəzarəti bizə keçdi. Layiqli qələbə qazandıq. Komandamızı təbrik edirəm. Gələcək oyunlara baxacağıq. Bu gün çempionatda ən maraqlı komandalardan birinə çevrilə bilmişik. "Kəpəz"in aqressiv gələcəyini bilirdik. Son pillələrdə gərgin mübarizə gedir. "Karvan-Yevlax" da bizimlə oyuna final kimi yanaşırdı. Bu da çempionatımıza rəng qatır.

- Mövsümün sonunda komandadan gedəcəyiniz bəllidi. Rəhbərlik yeni baş məşqçinin kim olması ilə bağlı sizdən məsləhət alıb?
- Xeyr, bu, rəhbərliyin qərarıdı. O barədə tam müzakirə də etməmişik. Çünki çempionat bitməyib. Komandada, rəhbərlikdə fikir yaratmaq istəmirik. Futbolçular son oyuna qədər işə peşəkar yanaşmalıdı. Biz də beləyik. İndi bunu müzakirə etsək, bir az qeyri-peşəkarlıq olar.

- Elvin Cəfərquliyev əvəzedici heyətə göndərilib. Milli ilə bağlı durum sizi narahat edir?
- Milliyə namizəd futbolçuların hamısı məni narahat edir. Yaxşı durumda deyilik. Potensiallı futbolçularımız azdı. Biz də bunları itirə bilmərik. Hər klub sərbəstdi, öz qərarları var. Başqa legionerlər də var ki, klublarında oynamırlar. Yaxşı halda deyilik. Amma yayda vaxt olacaq. İnanıram ki, yeni mövsüm hamı üçün xeyirli olar.

- Qarşıda 4 tur qalıb. Futbolçular oyuna hansı motivasiya ilə çıxacaqlar?
- 6 komanda var ki, ilk olaraq premyer-liqada qalmalıdı. Son iki mövsüm sürprizlərlə doludu. Sonuncu yerdə olacaq komandanı proqnozlaşdırmaq çətindi. Çünki bu, büdcə məsələsi deyil. Hədəf iki ildi liqada qalmaqdı. Amma bu mövsüm kubokda irəlilədik. Püşkatma bizim üçün çətin idi. "Qarabağ"ı keçsək, "Sabah"la qarşılaşacaqdıq. Çempionatın bəzi vaxtları oldu ki, qalib gəlsəydik, "dördlüy"ə yüksələ bilərdik. "Araz-Naxçıvan"a evdə uduzduq. Qışdan sonra daha rahatıq. Çempionat başlayandan "düşmə zonası"nda olmamışıq. Özümüzə yaxın rəqiblərdən üstün olmuşuq. Bəzi şeylər var ki, büdcəyə bağlıdı. Avrokuboklara oynamaq istəyirsənsə, rəqiblərinlə ayaqlaşmalısan. Bir oyunla çempionatı dəyərləndirməməliyik, ümumi baxmalıyıq. Ümumi baxsaq, futbolçular gözləntilərin daha yaxşısını etdi.

- AFFA rəhbərliyi ilə söhbətinizdə hakimliklə bağlı müzakirələriniz olur?
- Cahangir müəllimlə söhbət edəndə futbolun içində olan bütün mövzulara toxunuruq. Onlardan biri də hakimlikdi. Bəzən futbolu şouya çevirmək istəyirik. Bir az Türkiyə superliqasına baxıb, o hadisələrlə eyniləşdiririk. Belədə, gənc hakimlər bəzən bu təzyiqi üzərindən ata bilmir. Səhvlər olur. Hər şeyi hakimlərin üzərinə ata bilmərik. Razıyam, çox kobud səhvlər oldu, klubların haqqına girildi. Bunu demək lazımdı. Amma hakimləri silmək çıxış yolu deyil. Sabah hakim tapa bilməyəcəyik. Onların da üzərinə bu qədər getmək olmaz. Səhvləri aşkar müzakirə edəndə hakimlər qorxur. Çempionatın səviyyəsini yüksəldiriksə, hakimliyin səviyyəsi də qalxmalıdı. Yoxsa, narazılıq çox olacaq.