"Belə davam etsə, növbəti dəfə mətbuat konfransında iştirak etməyəcəm"
"Mətbuatda bir neçə dəfə yazılar gedib. Bu, həm mənə, həm "Sumqayıt"a qarşı haqsızlıqdı. Mənimlə komanda arasında heç bir münaqişə yoxdu. Belə davam etsə, növbəti dəfə mətbuat konfransında iştirak etməyəcəm. Oyuna gəldikdə, çətin oldu. Çalışdıq və 3 xal qazandıq. Ən vacibi də budu".
"Football-plus.az" xəbər verir ki, bu sözləri “Sumqayıt”ın baş məşqçisi Saşa İliç Misli premyer-liqasının 29-cu turunda "İmişli"yə 2:0 hesabı ilə qalib gəldikləri oyundan sonra deyib. Baş məşqçi komandanın kapitanı Səbuhi Abdullazadənin oyunu və əvəzlənməsi barədə fikirlərini bölüşüb:
"Səbuhiyə böyük hörmətim var. Onu bəyənmirəm, deməzdim. Sadəcə oyununu dəyişməlidi. Əvəzlənməyi normaldı. Səbuhinin böyük potensialı var, millinin vacib oyunçularındandı".
Mütəxəssis ikinci hissədə yaranan çoxsaylı qol epizodlarını rəqibin boşluqları ilə əlaqələndirib:
"Qeyri-adi heç nə etmədik. İlk hissədə qol vurmuşduq. İkinci hissədə rəqib irəli çıxırdı və boşluqlar yaradırdı".
Saşa İliç gələcək planları və klubun yeni strategiyası barədə verilən sualı belə cavablandırıb:
"Rəhbərliklə danışdıq və bu mövsümün qalan hissəsində gənclərə şans verməyi seçdik. Bu strategiya ilə davam edəcəyik. Hazırda diqqətimiz qarşıdakı dörd oyundadı".
Təcrübəli mütəxəssis mətbuat konfranslarında iştirak etməmək xəbərdarlığına və jurnalistlərlə münasibətinə aydınlıq gətirib:
"Bəlkə, düzgün başa düşülmədi. Problemi izah etmək istəyirəm. Mənim, komandam barədə reallıqlar yazılsın. Dani ilə mübahisəmi yazan jurnalistə də deyin ki, həqiqətləri yazsın. Mənim işim, taktiki gedişlərim barədə yazıla bilər. Amma olmayan şeyləri demək doğru deyil".
Baş məşqçi avrokuboklar uğrunda mübarizədə itirilən xalların təsirini dəyərləndirib:
"Avrokuboklar uğrunda mübarizə aparırsansa, bu hədəfləri olan komandalarla oyunlarda xallar itirməmək vacibdi".
Yekunda Saşa İliç Nikola Ninkoviçin qaçırdığı penalti epizoduna toxunub:
"Futbolda belə hallar olur. Daha əvvəl Rüstəm Əhmədzadə də vura bilməmişdi. Ninkoviç bizim üçün vacib oyunçudu. Görək, növbəti penaltini kim vuracaq".
Digər xəbərlər
