Misli premyer-liqasının 29-cu turunda “Araz-Naxçıvan” səfərdə “Qəbələ” ilə heç-heçə etdi.

“Football-plus.az” qonaqların baş məşqçisi Andrey Demçenkonun oyunsonrası mətbuat konfransından hesabatı təqdim edir.

- İlk yarıda oyunun axarına nəzarət etdik. Rəqibin sürətli əks-hücumlar qurduğunu bilirdik. Futbolda əsas qaydalardan biri budu ki, sən qol vurmasan, sənə vuracaqlar. Bu da bizim başımıza gəldi. Böyük futbol xırda detallardan ibarətdi. Bu detallarda isə bu gün çox pis oynadıq. Sonda qol vurmaq imkanımız olsa da, alınmadı. Sonda həm qalib gələ, həm də uduza bilərdik.

- Komandaya gələndən sonra nəyi dəyişmək istəyirdiz? Bu müddətdə nə alındı, nə alınmadı?
- İlk növbədə müasir futbol oynamaq, topla daha çox hərəkət edən komandaya çevrilmək istədik. Texniki hazırlığımızan razı deyilik.

- Hansı mövqedə çatışmazlıqların olduğunu düşünürsüz?
- Bu gün əlimin altında olan oyunçularla işləyirəm. Komandanı mən qurmamışam.

- Hər turda xal itkisi olduqca avrokuboklara vəsiqə şansınız azalır. Qalan turlar üçün motivasiyanız varmı?
- Razıyam, hazırda turnir cədvəli o qədər də yaxşı yerdə olmadığımızı göstərir. Hələ ki bu bizdə alınmır. Müqaviləmin müddəti mayın sonuna qədərdi.

- Klub prezidenti Zaur Axundov müsahibəsində demişdi ki, bu nəticələrin səbəbkarı Elmar Baxşıyevin yığdığı heyətdi. Komanda bu yay avrokuboklara getməsə, məsuliyyətin nə qədərini üzərinə götürəcəksiz?
- Dərhal demək istəyirəm ki, bütün məsuliyyət baş məşqçinin üzərindədi.

ORXAN