“Qarabağ”da köklü dəyişiklik etməyin vaxtı çatıb. Bu mövsüm komanda Çempionlar Liqasında nə qədər uğurlu olsa da, futbolçular ölkə çempionatına köklənməklə bağlı ciddi problem yaşadı. Bəzi futbolçular ağır uğurdan, nailiyyətdən doyub. Əslində son yay “transfer pəncərəsi”ndə də heyət bir qədər dəyişmiş, 5 yeni futbolçu cəlb olunmuşdu. Amma görünür, kifayət deyilmiş.

Bu gün Abdulla Zubir, Kevin Medina, Marko Yankoviç, Aleksey Kaşuk, Leandro Andrade, Kadi Borges, Toral Bayramov kimi futbolçuların Faydalı İş Əmsalı hədsiz aşağı düşüb. Zubir əvvəlki Zubir deyil. Artıq heç nədən qol yarada bilmir.

Yankoviç qışda getməliydi. Təkliflər var idi, gedəcəyi gözlənilirdi. Amma məcbur qaldı. Bundan sonra da tanıdığımız Markonu görmədik.

Medina kobud səhvlərə yol verir. Əsas səbəb isə Sami Mmaenin əvəzedici komandaya göndərilməsi və Bəhlul Mustafazadənin zədələnməsi oldu. Çünki rəqabət zəifdi, kolumbiyalı da rahatdı. Aaron Maluda “Qarabağ”ın müdafiə xəttini rüsvayçı vəziyyətə salmışdı.

Aleksey Kaşuk özünə komandada yer tapa, heç cür uğurlu ola bilmədi. Qurban Qurbanov bunun üçün əlindən gələni etdi, alınmadı ki alınmadı.

Əvvəlki mövsümlərdə “Qarabağ” xal itirəndə təsadüf deyilirdi. Amma “Kəpəz”, “Şamaxı” ilə oyunlarda xal itkiləri təsadüf yox, tükənmə göstəricisidi. Bu futbolçular çempion olacaq gücdə deyil. Mental baxımdan bunu bacarmayacaqlar.

Hazırda “Qarabağ” 2-ci pillədədi, ən yaxın izləyicisi “Turan Tovuz”u cəmi 1 xal qabaqlayır. Şəxsi oyunları da var. “Köhlən atlar” ardıcıl iki oyunda “Neftçi”nin qonağı olacaq. Yəni ikincilik də şübhə altındadı. “Neftçi” və “Zirə” yersiz xal itkilərinə məruz qalmasaydı, “Qarabağ” avrokuboklardan uzaq da düşə bilərdi.

Əlqərəz, artıq bu heyətin peyvəndə yox, cərrahi müdaxiləyə ehtiyacı var. İnandırıcı deyil ki, bu çempionatın sirrini Qurban Qurbanovdan yaxşı bilən olsun. Ən azı 6-7 futbolçu göndərilməlidi.

Bəli, Qurban bəy, köklü dəyişikliyin vaxtıdı. Əməliyyat masası hazırdı, cərrah bıçağı size gözləyir. Risk edin, komandanı yeniləyin. Sabah gec ola bilər!

MÜZƏFFƏR QULUZADƏ