''Beşiktaş''la bağlı növbəti transfer iddiası ortaya atılıb. ''Skay Sports''un paylaşdığı xəbərə inansaq, İstanbul nəhənginin ''Bayer-04''ün üzvü Alexandro Qrimaldo ilə apardığı danışıqlar pozitiv yöndə irəliləyir.

Daha doğrusu, ''ağ-qaralar''ın təklifi ispaniyalı sol müdafiəçinin diqqətini çəkib. Detallar barədə məlumat verilməsə də, iddialara görə Qrimaldo ona təklif olunan layihədən və baş məşqçi Sərgən Yalçının ona vermək istədiyi roldan məmnun qalıb. ''Beşiktaş''ın idman direktoru Sərkan Rəçbər isə Qrimaldo ilə maddi baxımdan anlaşmağa müvəffəq olub. Ancaq klublar da öz aralarında anlaşmalıdı.

Deyilənə görə ''Bayer-04'' Qrimaldoya görə 20 milyon avro tələb edir. Bununla belə, ''Beşiktaş'' 30 yaşlı futbolçunun klubla müqaviləsinin cəmi 1 il qaldığını nəzərə alaraq təzminatı mümkün qədər aşağı endirməyə çalışır. Hələ ki, klublar arasında anlaşma əldə olunmayıb.

''Barselona''nın yetirməsi olan, ''Benfika''da ulduzu parlayan, 2023-dən ''Bayer-04''ün şərəfini qoruyan və İspaniya yığması ilə AÇ-2024-ün qalibi olan Qrimaldo sol ayağı ilə qüvvətli zərbələrə və əla ötürmələrə malikdi.

Eyni zamanda standart zərbələrin mahir ifaçısı kimi tanınan bu futbolçu cari mövsümdə iştirak etdiyi 41 rəsmi oyunda aktivinə 14 qol, 11 məhsuldar ötürmə yazıb.