Bilindiyi kimi, AFFA Hakimlər Komitəsinin sədri Rəhim Həsənov dünən “Qarabağ” – “Sabah” matçının baş hakimi Elçin Məsiyevlə “Zirə” – “Neftçi” oyununun baş hakimi İnqilab Məmmədovun da səhvini etiraf etdi. Düzdü, Elçin bəyin də yanlış qərarı yetərincə əhəmiyyətlidi, lakin Zirədəki görüşün “ağ-qaralar”ın ciddi narazılığıyla müşayiət edilməsi İnqilab bəyin səhvinin gündəmi daha çox zəbt etməsinə səbəb oldu.

Dünən o da ortaya çıxdı ki, AFFA-nın inzibati binasında “Neftçi”nin Müşahidə Şurasının sədri, Baş İcraçı Direktoru və klubun digər nümayəndələri AFFA rəsmiləri və Hakimlər Komitəsinin sədri ilə görüşüb. Klub görüşdə Zirədə qapısına vurulan qola etiraz edib, eyni zamanda məşqçilərə və futbolçuya göstərilən əsassız qırmızı vərəqələrin ləğvini tələb edib. Düzü, bu görüşün ictimaiyyətə detallı açıqlanmasından sonra düşünürdük ki, klubun tələbləri müsbət qarşılanıb. Sən demə, “Neftçi” bu görüşdə heç nəyə nail ola bilməyib! Çünki AFFA İntizam Komitəsinin bu gün açıqladığı qərarlardan görünür ki, “ağ-qaralar”ın aldığı cəzalar qüvvədə qalıb. Belə ki, baş məşqçi Yuri Vernidub, köməkçisi Dmitro Kara Mustafa və futbolçu Breno Almeyda hərəyə bir oyun cəzalanıb. Hələ onu demirik ki, “Neftçi” həm bu, həm də azarkeşlərin qayda pozuntularına görə ümumilikdə 26200 manat cərimələnib.

Öz aramızdı, bəlkə də “Neftçi”nin görüşlə bağlı bəyanatda qarşı tərəfə açıq-aşkar meydan oxuması, hakimlərin məqsədyönlü, qərəzli qərarlar verdiyini deməsi, qarşısındakının kimliyinin fərqinin olmadığını bildirməsi qıcıq yaradıb. Hər halda, Rəhim Həsənov hakimin səhv qərar verdiyini etiraf edirsə, bundan sonra başverənlərin də həmin səhvin fəsadları olduğu gün kimi aydındı. AFFA məhz bu məqamı nəzərə ala, cəzaları ləğv edə, həm də münasibətlərin daha da pisləşməsinə mane ola bilərdi. Heç şübhəsiz, nəinki tələbləri qarşılanmayan, hətta növbəti cəzalarla üzləşən “Neftçi” tərəfi düşüncəsində haqlı olduğu qənaətinə gələcək.

Beləliklə, federasiya ilə klub arasındakı soyuq müharibə qızışır. Allah axırını xeyir etsin.

KƏNAN BAHADIR