Bizon Azərbaycan Kubokunun yarımfinal mərhələsinin cavab oyununda “Turan Tovuz” səfərdə “Zirə” səddini aşa bilmədi - 0:0.

“Football-plus.az” xəbər verir ki, oyunsonrası mətbuat konfransında qonaqların məşqçisi Yunis Hüseynov media önünə çıxıb.

- Hər iki komanda qalib gəlmək istəyirdi. Güclü tərəf biz idik. Ötən oyunda haqqımızı yedilər. Finala layiq tərəf biz idik. Ötən oyundakı hakim səhvlərinə görə mərhələ keçə bilmədik. Bu gün qol da vurduq, sayılmadı.

- Nəyə görə komanda hücumda effektli ola bilmədi? “Zirə” çox yaxşı müdafiə olundu, yoxsa ilk oyundakı qərarlar üzündən futbolçularda psixoloji gərginlik var idi?
- Həmin qərarların futbolçulara psixoloji təsiri var idi, danmıram. İki təmiz penaltimizi verməmişdilər. Komandamız oyuna pis hazırlaşmamışdı. Rəqibin 5 müdafiəçi ilə oynayacağını, əks-hücuma köklənəcəyini bilirdik. İlk yarıda qol vursaydıq, ikinci hissədə də qol olacaqdı. “Zirə” bu gün ancaq müdafiə olundu.

- Bugünkü idarəçilikdən razı qaldız?
- Narazı qalmadım. Amma son epizoda baxmamışam. Məncə, qol var idi.

- Bundan sonrakı hədəf ikinci olmaqdı?
- Çempion olmaq istəməyən komanda hədəfsizdi. 2-ci olmaq yox, qarşıdakı oyunlarda qalib gəlmək istəyirik.

MÜZƏFFƏR QULUZADƏ