İkinci liqada liderliyi heç kimə verməyən “Xankəndi” ilk “altılıq”dakı oyunlarını əvvəlki kimi “Palms Sports”un ehtiyat meydançasında yox, Şamaxı Olimpiya İdman Kompleksinin stadionunda keçirəcək. PFL-in saytında “Xankəndi” - “Dinamo” qarşılaşmasının afişasında məhz belə göstərilib.

Maraqlıdı, “Xankəndi” niyə ev oyunlarını keçirdiyi meydançanı dəyişdi?

Klubun meneceri Rəşad Babayev “Futbol+”in suallarını cavabladı.

- Mövsümdən əvvəl iki stadionla müqaviləmizi PFL-ə təqdim etmişdik. Bunlar “Palms Sports”un ehtiyat meydançası və Şamaxı Olimpiya İdman Kompleksinin stadionu idi. Belə deyək, hər ikisi “Xankəndi”nə aid stadionlardı. Belə qərara gəldik ki, “altılıq”dakı oyunları Şamaxıda keçirək. Açığı, həm də “Neftçi”dən bizə məktub gəldi. Bildirdilər ki, aprel-may aylarında məşq qrafiki çox sıxdı. Bizə tövsiyə etdilər ki, başqa stadionlara baxaq. Bizdə də alternativ variant kimi Şamaxı OİK-in stadionu var idi. PFL-ə məktub yazıb xahiş etdik ki, qalan ev oyunlarımızı Şamaxıda keçirək. PFL rəhbərliyi məsələyə baxdı, araşdırdı, xahişimizi nəzərə aldı. Hansısa təzyiq olmadı. Bundan söhbət gedə bilməz. Ümumiyyətlə, Şamaxıdakı stadion 2-ci liqa yarışları üçün idealdı. Örtük keyfiyyətlidi. Kompleks olaraq da komandanın bir gün öncədən yerləşməsi, məşq etməyimiz - bunlar hamısı şərtlərimizə uyğun gəldi. Bizim üçün də orda oynamaq məqsədəuyğun oldu. Bu təsdiqlənib. Təqvim də bəllidi. Bundan sonrakı oyunları, inşallah, Şamaxıda keçirəcəyik. Hansısa narahatedici amil yoxdu. PFL seçimimizi nəzərə aldı, qəbul etdi.

- Bəs gələn mövsüm hansı stadionda oynacağınızla bağlı dəqiq məlumat varmı? Xankəndidə oynamaq ehtimalı nə dərəcədə realdı?
- Mövsüm başa çatmadığına görə danışmaq tezdi. Əslində müəyyən planlar var. Əsas məqsədimiz öz azarkeşlərimiz qarşısında oynamaqdı. Bütün planlarımız bunun üzərində qurulub. Xankəndidə oynamaq tək bizdən asılı məsələ deyil. Dövlətin də qərarı olmalıdı. Stadion Gənclər və İdman Nazirliyinin balansındadı. Onlarla da danışığımız davam edir. Stadionda təmir-bərpa işləri gedir. Mayın sonuna qədər bu işlər davam edəcək. Stadionun istismara verilməsindən sonra bu haqda danışmaq olar. Bundan sonra nazirliyin qurumları ilə danışacağıq. Hələ ki mənfi cavab almamışıq. Cənab nazir Fərid Qayıbovun stadionla bağlı çıxışlarını oxumuşam, deyib ki, stadion hazır olandan sonra yerli klubların oynamasına icazə veriləcək. Bu ehtimal baş tutmasa, alternativ stadionlara baxılacaq, Şamaxıdakı stadion da daxil olmaqla.

MÜZƏFFƏR QULUZADƏ