“FİFA Series” turnirinə çağrılan futbolçulardan ikisi yığmada debüt etdi. Bunlar “Turan Tovuz”un yarımmüdafiəçisi Ayxan Hüseynov və mövsümə Tovuz təmsilçisində başlayıb, qışda “Şamaxı”ya transfer olunan müdafiəçi Abdulla Rzayevdi.

Ayxanın çağrılacağı gözlənilirdi. O, legionerlərlə zəngin “Turan Tovuz”da əsas heyət üzvünə çevrilib. Qış fasiləsindən sonra göstərdiyi oyun da göz oxşayır. Komandasının əsas fiqurlarındandı. Rusiya məktəbinin yetirməsi, Sankt-Peterburqda boya-başa çatan Ayxan millidə oynamağa layiq futbolçudu. Həm sol cinah vingeri, həm də 10 nömrə kimi oynamağı bacarır.

Abdulla isə “Sabah”ın yetirməsidi. İstedadlı futbolçudu. “Turan Tovuz”da Xorxe Silva ilə forma mübarizəsində uduzması başadüşülən idi. Doğru qərar verib “Şamaxı”ya getdi və “beşli” yarımmüdafiənin sağında lateral kimi özünü ən yaxşı tərəfdən göstərir. “Zirə”də Qismət Alıyevdən, “Şamaxı”da da Abdulla Rzayevdən başqa bu mövqedə oynayan yerli futbolçu yoxdu. Abbas Hüseynov “Qarabağ”da Mateus Silva və Dani Boltdan sonra mövqeyinin üçüncü futbolçusudu.

Hər iki futbolçu gələcəkdə yığmamıza xeyir verə bilər. Ayxan Abbasov nə qədər dilə gətirməsə də, bu heyət ekspermental idi. Ayxan Hüseynov özünü ən yaxşı tərəfdən göstərdi, məhsuldar ötürmə ilə də yadda qaldı. Abdullanın mövqeyində yerli futbolçuların azlığı isə onun üçün üstünlükdü.

MÜZƏFFƏR QULUZADƏ