Misli premyer-liqasının 23-cü turunda “Araz-Naxçıvan” səfərdə “Qarabağ” önündə darmadağın oldu - 0:6.

“Football-plus.az” xəbər verir ki, oyunsonrası mətbuat konfransında qonaqların çalışdırıcısı Andrey Demçenko media önünə çıxıb.

- “Qarabağ”ı qələbə münasibəti ilə təbrik edirəm. Çox yaxşı oynadılar. Onlar istədikləri hər şeyi edə bildilər. Bizim fikrimiz daha başqa idi. Pressinq edib, onları topsuz saxlamaq istəyirdik. Hansısa futbolçu bunu etməyəndə bu bütün komandaya təsir edir. Birinci qol oyunumuza təsir etdi. Qapıçımız topu götürməliydi, səhv etdi. Belə olanda rəqibə özgüvən verirsən, nəticəyə təsir edir. Azarkeşlərimizdən üzr istəyirəm. Onlar bugünkü məyusluğa layiq deyildilər. Futbolu bütün komanda oynamalıdı. Bizim futbolçuların bəziləri oynamaq istəyirdi, bəziləri yox. Təkcə oyunçuların yox, məşqçilərin də səhvi var.

- Hədəfiniz avrokuboklardı. “Şamaxı” və “Karvan-Yevlax”a qarşı oyunlarınız var qarşıda. Bu matçları həlledici hesab edirsiz?
- Düzdü, bu məğlubiyyətdən sonra toparlanmaq çətin olacaq, amma çalışacağıq.

- Sizin ən böyük səhviniz elə “Qarabağ”a qarşı topla oynamaq istəyi deyildi? Çünki sübut olundu ki, bunu bacarmadız.
- “Qarabağ” kimi komandaya qarşı oynamaq asan deyil. Futbolçularda da narahatlıq olur, oyun alınmır. Çəkinirlər.

- Oynamaq istəməyən futbolçularla bağlı “ölçü götürmək” fikriniz var?
- Komandanı bir yerə yığıb səhvlərimizi axtarmalıyıq. Oyunçular cərimənəcək, bu qərarı klub prezidenti verir.

- Ola bilər ki, futbolçular sizə görə bilərəkdən oynamaq istəmir? Çünki “Qarabağ” kimi komandaya qarşı oynamaq əlavə motivasiya olmalıdı.
- Bizim fəlsəfəmiz eynidi. Bütün komandala qarşı eyni oyun göstərmək istəyirik. Hərdən belə də olur.

- Komandanın ev oyunlarını Bakıda keçirməsinin nəticəyə təsiri var? Ukraynada Donetsk təmsilçisinin ev oyunlarını Kiyevdə oynamasına necə reaksiya göstərərdilər?
- Harda oynamağımızın fərqi yoxdu. Çox komanda var ki, Bakıda məşq edir, burda da oynayır.

MÜZƏFFƏR QULUZADƏ