"Qarabağ"ın hücumçusu Kamilo Duran Çempionlar Liqasının pley-off mərhələsinin "Nyukasl"la oyunundan öncə keçirilən mətbuat konfransında iştirak edib.

"Football-plus.az" kolumbiyalı futbolçunun fikirlərini diqqətinizə çatdırır.

- Fərqindəyik ki, bizi çox çətin və tarixi oyun gözləyir. Doğma azarkeşlərimizin qarşısında oynayacağıq. "Nyukasl" çox çətin rəqibdi. Amma istənilən halda, əlimizdən gələni edəcəyik ki, azarkeşlərimizi sevindirək və uğurlu nəticə qazanaq.

- Son görüş də İngiltərə premyer-liqası təmsilçisinə qarşı olub. Bu ölkənin komandalarına qarşı hansı detala xüsusi diqqət vermək lazımdı ki, uğurlu nəticə qazanasız?
- İngiltərə təmsilçiləri çox sürətli və fiziki cəhətdən güclü komandalardı. Onlara qarşı ilk oyunumuzda bunu hiss etdim. Yaxşı formada hazırlaşmışıq. Çətin rəqib olsa da, biz də onların zəif cəhətlərindən istifadə etməyə çalışacağıq.

- "Qarabağ"la indiyə qədər keçdiyin yolu necə xarakterizə edərdin? Gənc olsan da, Çempionlar Liqasında oynayırsan...
- Təbii ki, mənim üçün xoşdu. Xoşbəxtəm. "Qarabağ"da bu yolu keçmək karyeramın ən uğurli dönəmidi. Gəncəm, daha inamlı olmalıyam, üzərimdə işləməliyəm.

- "Qarabağ"ın heyətində effektiv çıxışın yayda keçiriləcək dünya çempionatında oynamağına nə dərəcədə təsir edə bilər? Kolumbiya millisinə dəvət ala bilərsən?
- Bu mövsüm uğurlu keçir. Millidə oynamaq bir kolumbiyalı kimi uşaqlıq arzumdu. Belə davam edəcəmsə, hər dəfə milliyə düşmək daha yaxın olacaq. Hər kəs dünya çempionatında oynamaq istəyər. Arzumdu. Hələ ki mənə hər hansı dəvət, zəng olmayıb.

- "Nyukasl"la görüşdə qol vursan, sənə qədər bir mövsümdə 5 qol vurmuş Radamel Falkao və Cekson Martinesin rekordunu təkrarlayacaqsan və Kolumbiya futbol tarixinə düşəcəksən. Bunu Bakıda etməyi arzulayırsan?
- Keçən həftə oyunlar olsa da, "Nyukasl"la görüşü düşünürdüm. Buna hazıram.