Kəpəz (Gəncə) - Şamaxı 0:2 (0:2)
33. Yusif İmanov - 5,0
14. Adama Fofana – 5,0
4. Mate Abuladze – 6,0
29. Dioqo Verdaşka (k) - 5,5
5. Rauf Hüseynli - 5,5
12. Mahamadu Ba – 4,0
(88. Şakir Seyidov, 46) - 4,5
24. Olavale Onanuqa – 5,0
(20. Elcan Əbilov, 72) - 5,0
27. Məqsəd İsayev - 4,0
(77. Fərid Nəbiyev, 46) - 5,5
8. Veysəl Rzayev – 4,5
(11. Rəhman Hacıyev, 46) - 5,5
10. Rinosuke Ohori – 5,5
7. Ehtiram Şahverdiyev - 4,5
(9. Luis Paçu, 46) - 5,0

Ehtiyat oyunçular
22. Məmməd Hüseynov
81. Elgün Bayramov
99. Əli Səmədov
17. Ümid Səmədov
23. Fərid Kələntərov
21. Sadiq Şəfiyev
80. Şahnur İsmayılov
Komandanın ən yaxşısı: Mate Abuladze
Baş məşqçi: Azər Bağırov

1. Rikardo Fernandes – 7,0
4. Sezar Enrike – 5,5
44. David Santos – 5,5
5. Arsen Ağcabəyov (k) - 6,5
82. Rüfət Abbasov – 6,0
7. Edqar Adilxanov – 6,0
(27. Emil Süleymanov, 81) - qiymətsiz
97. Oruc Məmmədov - 5,5
13. Rikardo Apolinario – 5,5
(8. Alfons Msanqa, 58) - 4,5
2. Abdulla Rzayev – 6,0
(80. Həbib İsmayılov, 61) - 5,5
9. Karim Rossi – 6,5
(19. Abdullahi Şuaybu, 81) - qiymətsiz
11. Dioqo Balau – 6,0
(10. Andrey Tırkovyanu, 81) – qiymətsiz

Ehtiyat oyunçular
62. Abdulla Seydəhmədov
99. Səlim Həşimov
17. Rafael Məhərrəmli
21. Bilal İsmayılov
48. Ramiz Muradov
14. Ravil Qafarov
Baş məşqçi: Ayxan Abbasov
Komandanın ən yaxşısı: Rikardo Fernandes

Qollar: A.Ağcabəyov, 12 (0:1, R.Apolinario). K.Rossi, 45+1 (0:2, A.Rzayev).
Vərəqələr: R.Apolinario, 24 (qeyri-idman hərəkəti). A.Rzayev, 41 (qeyri-idman hərəkəti). Ş.Seyidov, 54 (qeyri-idman hərəkəti). D.Verdaşka, 79 (qeyri-idman hərəkəti). R.Fernandes, 87 (oyunun bərpasının ləngidilməsi) - sarı.
Hakimlər: CAVİD CƏLİLOV, Kamran Bayramov, Müslüm Əliyev, Kamran Əliyev (hamısı Bakı).
VAR hakimi: Fərid Hacıyev (Bakı).
VAR hakiminin köməkçisi: Asiman Əzizli (Bakı).
Hakim-inspektor: Munis Abdullayev (Bakı).
AFFA nümayəndəsi: İlham Əliyev (Bakı).
31 yanvar. Yevlax. Şəhər stadionu. 500 tamaşaçı (6000 yerlik).
Yalnız ikinci hissəyə 3 dəqiqə əlavə olunub.
Oyunun qiyməti: 5,5.

Azər Bağırovun qayıdışından sonra yenidən yavaş-yavaş xallar qazanmağa başlayan, hətta son turda səfərdə “Qarabağ”ı məğlub edən “Kəpəz” ötən matç evdə autsayderlərdən biri “Qəbələ”dən dörd cavabsız top buraxan Şamaxı”nı nominal ev sahibi kimi qəbul etdi. Oyundan əvvəl hansı komandanın qalib gələcəyini təxmin etmək çətin idi.

İlk təhlükəli vəziyyət 4-cü dəqiqədə yarandı. Əslində elə də təhlükəli demək olmaz. Cərimə meydançası xəttinin üzərindən Rossinin zərbəsi dəqiq olsa da, zəif alındı. Top da Yusifin qucağına gəldi. 12-ci dəqiqədə qonaqlar hesabı açdı. Apolinario Onanuqanın nəzarət etdiyi topu oğurlayaraq Arsenə ötürdü, Arsen isə uzaqdan “altılığ”a zərbə endirərək qol vurmağı bacardı. Bu, Arsenin karyerasında vurduğu ikinci qoldu. Maraqlıdı ki, 25 yaşlı müdafiəçi ilk qolunu ötən mövsüm də qərb təmsilçisinə - “Turan Tovuz”a vurub. 21-ci dəqiqədə isə Ohori şirvanlıları həyəcanlandırdı. Onun uzaqdan zərbəsi qapının yanından keçdi. “Kəpəz” 26-cı dəqiqədə yenidən qola yaxınlaşdı. Məqsədin cərimə zərbəsi dəqiq alınsa da, Rikardo uzanaraq topu çıxarmağı bacardı. İlk hissədə qonaqların heyətində döyüşkənliyi ilə seçilən iki futbolçu var idi - debüt edən Abdulla Rzayev və Edqar Adilxanov. 43-cü dəqiqədə Edqar məhsuldar ötürmə edə bilərdi. Lakin onun ötürməsini Oruc qola çevirsəydi. Fofana ilə birəbir mübarizədən çətinliklə qalib ayrılan Edqar topu nəzarətsiz qalan Oruca ötürdü. Əslində Oruc da yaxşı zərbə endirmişdi. Amma şans gənc futbolçudan üz döndərdi. Top cüzi fərqlə tirin üstündən keçdi. 45+1-ci dəqiqədə Rüfətin sol cinahdan asmasını Abdulla sinəsi ilə Rossinin qabağına atdı, Rossi isə topu Yusifin dayandığı küncə vurdu. İlk hissə bu hesabla başa çatdı.

İkinci hissədə nominal ev sahiblərinin müəyyən üstünlüyünün olduğununu demək mümkündü. Azər Bağırovun əvəzetmələri də komandanın fəallığına təkan verdi. 53-cü dəqiqədə sol cinahla irəliləyən yeni transfer Rəhmanın asmasından sonra Fərid “2-ci mərtəbədə” Rüfəti üstələyərək qapıya zərbə endirməyi bacardı, amma Rikardo yenə də çox inamlı idi. 61-ci dəqiqədə Edqardan topu qəbul edən Msanqa iki “Kəpəz” futbolçusunu keçərək qapıya zərbə endirdi, lakin Yusif bu zərbənin qola çevrilməsinə mane oldu. 76-cı dəqiqədə isə Edqar 3 futbolçunu keçərək qapıya zərbə vurdu, Yusif seyv etməyi bacardı. 3 dəqiqə sonra isə “Kəpəz” qol vurmağa yaxın oldu. Rəhmanın asması bu dəfə də uğurlu alındı. Ohorinin başla zərbəsi isə qol olmadı, səbəb də aydındı - Rikardo Fernandes. 82-ci dəqiqədə Şuaybu əks-hücumdan sonra qol da vurdu, ofsayd səbəbindən qol qeydə alınmadı. 6 dəqiqə sonra portuqaliyalı qapıçı daha bir gözoxşayan hərəkətlə yadda qaldı. Fəridin hava ötürməsindən sonra Paçunun başla zərbəsini elə çıxardı ki...

“Şamaxı” bu qələbə sayəsində xalını 23-ə çatdırdı. “Kəpəz” isə “Qəbələ”nin də qələbəsindən sonra 11-ci pilləyə düşdü.

Gözdən qaçmadı
// “Ayın qolu” layihəsi çərçivəsində dekabrın ən yaxşı qolunun müəllifi olan Rionosuke Ohori mükafatlandırıldı. Ona mükafatı “Azərlotereya” ASC-nin İctimaiyyətlə əlaqələr və korporativ məsuliyyət üzrə rəhbəri Seymur Teymurov təqdim etdi.
// Oyun başa çatandan sonra Azər Bağırov azyaşlı azarkeşlərlə şəkil çəkdirdi.
// İngiliscə bilməyən Sezar Enrikədən müsahibə alan jurnalistlərə Dioqo Balau tərcüməçilik edirdi.

MÜZƏFFƏR QULUZADƏ