"Araz-Naxçıvan" Misli premyer-liqasının 17-ci tur matçında "İmişli" ilə heç-heçə etdi - 2:2.

"Football-plus.az" xəbər verir ki, "qırmızı-ağlar"ın baş məşqçisi Andrey Demçenko oyunsonrası mətbuat konfransında jurnalistlərin suallarını cavabladı.

- Hava şəraiti və stadionun vəziyyəti bizə yaxşı oyun göstərməyə imkan vermədi. Çalışdıq ki, ən yaxşısını edək. Təəssüf ki, standart vəziyyətlərdən qollar buraxdıq. Oyuna nəzarət etdik. Qol vurmaq istəsək də, qazonun durumu bizə imkan vermədi.

- Mövsümün əvvəlində əsas qapıçı Avram idi. Bu dəfə "çərçivə"də Tərlan dayanmışdı...
- Futbolçuların hazırlıq səviyyəsinə baxırıq. Kim tapşırıqları daha tez yerinə yetirirsə, ona şans veririk.

- Sanki əvəzetmələrdə gecikdiz...
- Futbol oynamaq istəyiriksə, risk etməliyik. Belə qazonda istədiklərini etmək çox çətindi. Səhvlərdən qaçmaq olmur. Biz oyuna bacardığımız qədər nəzarət etməyə çalışdıq.

- Karyeranız ərzində daha bərbad qazonda çıxış etmişdiz?
- Qazonu bəhanə göstərmək istəmirəm. Belə vəziyyətdə futbolçular daha çox əziyyət çəkməlidi. Bəli, Ukraynada da bu cür qazonlar görmüşəm.

- Legioner limiti olmasa da, xeyli yerli futbolçuya şans vermişdiz. Bu, məcburiyyətdən atılan addım idi?
- Mənim üçün futbolçunun milliyəti önəmli deyil. Kim məşqlərdə özünü yaxşı tərəfdən göstərirsə, ona şans veririk.

- Növbəti turda "Neftçi" ilə qarşılaşacaqsız. İki ukraynalı məşqçinin duelini izləyəcəyik. Bu rəqibə qarşı necə hazırlaşacaqsız?
- Biz rəqib seçmirik. Oyundan oyuna hazırlaşırıq. "Neftçi"ni analiz edib buna uyğun hazırlaşacağıq.

- Debütanta qarşı matçda xal itirmək sizə mayda çətinlik yaratmayacaq?
- Qarşımıza avrokuboklara vəsiqə qazanmaq hədəfi qoyulub. Komandan çox istəklidi. Məqsədə çatmaq istəyirik.

KƏNAN BAHADIR