Viktor Osimhen təkcə “Qalatasaray”da yox, Nigeriya yığmasında da qollarını sıralamaqda davam edir.

"Football-plus.az" xəbər verir ki, Afrika Millətlər Kubokunda qrup mərhələsinin 2-ci turunda Nigeriyanın Tunisi məğlub etdiyi qarşılaşmaya məhz Osimhen damğa vurdu.

27-ci doğum gününü qeyd edən forvard komandasının 3:2 hesabı ilə qalib gələrək pley-offa vəsiqəni təmin etdiyi qarşılaşmada 1 qol, 1 məhsuldar ötürməlik performans sərgilədi. Onun havada sanki asılı vəziyyətdə qalaraq başla vurduğu qol sosial şəbəkələrdə də müzakirə olundu.

Yeri gəlmişkən, Osimhen bu qol sayəsində 2025-ci ildə klub və yığma səviyyəsində ən çox qol vuran futbolçuların siyahısında Lionel Messiyə çataraq ilk “4-lüy”ə daxil oldu.

Qeyd edək ki, bu siyahıda yalnız dünyanın ən güclü 20 çempionatında top qovan futbolçuların göstəriciləri əsas götürülüb. Ötən mövsüm Türkiyə çempionatının bombardiri olmuş Osimhen bu təqvim ilində 51-ci rəsmi oyunda 46-cı qolunu vurdu.

Messi də bu il Argentina və “İnter Mayami”nin heyətində 54 rəsmi oyunda 46 qol vurub. O, Osimhenlə 4-5-ci yerləri bölüşür. Siyahının ilk üç pilləsində isə Kilian Mbappe (“Real”, Fransa yığması, 66 qol), Harri Keyn (“Bavariya”, İngiltərə yığması, 60) və Erlinq Holann (“Mançester Siti”, İngiltərə yığması, 57) qərarlaşıb.

Onu da bildirək ki, Osimhenin hazırda Nigeriya yığmasında 32 qolu var. Onu yeni rekorddan cəmi 6 qol ayırır. Hazırda Nigeriya tarixinin ən məhsuldar futbolçusu hesabında 37 qol olan Rəşid Yekinidi.