Ənənəvi ümummilli sorğunun nəticələrini açıqlayarkən Emin Mahmudovun səsvermədə iştirakdan imtina etdiyi vurğulamış, bu məsələyə dönəcəyimizi bildirmişdik. Yeni il tətili bitdi və həmin sözü tutmağın vaxtıdı.

Bəli, 2025-in futbolçusunu müəyyənləşdirmək üçün keçirdiyimiz sorğuda Emin bəy həm ikiqat (2021, 2022) qalib olduğuna, həm də “Neftçi”nin kapitanı statusuna görə iştirak hüququna malik idi. Amma adına-sanına yaraşmayan hərəkət etdi. Emin “Futbol+”in tərtib etdiyi “10-luğ”a salınmadığına görə incidi, küsdü və iştirakdan boyun qaçırdı. Hətta küskünlüyü o dərəcəyə çatdı ki, bundan sonra heç vaxt iştirak etməyəcəyi ilə bağlı da mesaj göndərdi.

Niyə Emin? Sənə münasibətdə hansı haqsızlığımız, nə vaxt və harda olub? İki dəfə sorğumuzun qalibi olmusan. 2021-də müəyyənləşdirdiyin xal rekordu (455) bu günə qədər yenilənməyib. Sənə kim və niyə qərəz göstərsin ki? Bu hərəkətin peşəkarlıqdan tam uzaq, “Neftçi” kapitanı statusuna yaraşmayan addımdı.

2025-də nə “Neftçi” adına layiq oyun sərgilədi, nə də sən. Hətta özün də dekabrın sonunda belə bir açıqlama vermisən:

Və sən ili çox pis keçirən “Neftçi”nin kapitanısan. Nəticələrə görə birbaşa məsuliyyət daşıyan futbolçuların önündə qərarlaşıbsan. Milyonlarla pul xərclənir, amma komanda sonda 6-cı yeri tutur. Avrokubokların “a” hərfindən uzaq düşür. Deyim ki, sən xaruqələr yaratmısan, mükəmməl oyun göstərmisən, yox, belə deyil. Komanda necə, sən də elə. “Neftçi”nin nəticələri artıq neçə ildi sənin durumundan aslıdı. Sən yaxşı oynayanda yaxşı olub, pis olanda pis. “Neftçi” də bu qədər uğursuzdusa, deməli, həqiqətən danışmağa dəyməz.

Millinin bombardirisən. Əhsən! Haqqın, əziyyətin danılmazdı. Artıq Azərbaycan futbolunun tarixinə düşmüsən. Amma hansı millinin? İl ərzində bir qələdə də qazana bilməyən millinin! Sənin istedadına, futbolçu keyfiyyətlərinə şübhə yoxdu. Biz Azərbaycan futbol tarixinin ən yaxşılarını müyyənləşdirmək üçün sorğu keçirmirdik, 2025-ci ilin ən yaxşısı üçün sorğu keçirirdik.

2025-ci ildə 42 oyuna çıxmısan, 11 qol vurmusan. Nəticə də göz qabağındadı. Qəbul edək ki, son zədələrdən sonra hələ də formanı bərpa edə bilməmisən. Yaxşı oyunların var, amma sabit şəkildə deyil. 33 yaşdan sonra olar, olmaz – bu da ayrı sualdı. İnanaq ki, olar.

“Neftçi” uğursuz olduğu müddətdə “Neftçi”nin kapitanı necə uğurlu ola bilər? Komandan ötən mövsümü 6-cı yerdə bitiribsə, bu mövsümün qış fasiləsinə 8-ci pillədə yollanıbsa, necə ən yaxşı 10 futbolçudan biri olduğunu düşünürsən? Düzdü, komandanın oyunu bir nəfərdən asılı deyil. Amma “Neftçi” üç mövsümdü sən yaxşı oynayanda yaxşı nəticə göstərir. Sən bu komandanın beynisən. Sən işləməyəndə “Neftçi” adına yaxşı heç nə olmur. Sən gedənə qədər olmayacaq da.

Sorğuya şəxsi maraqlara əsir düşüb qatılmamaqla, təəssüf ki, peşəkarlıqdan uzaq idmançı olduğunu göstərdin. Ümid edək ki, səhvini anlayar, növbəti sorğuda iştirak etmək istəyərsən. Təbii, ona qədər “Neftçi”də qalsan...

MÜZƏFFƏR QULUZADƏ