Yayda, mövsüm başlamamış indini təxmin etsəydik, ən pis halda “Neftçi”ni 2-ci, 3-cü yerdə düşünərdik. Amma vəziyyət necədi? Bakılılar səkkizincidi.

Bu 4 ayda komandanı üç mütəxəssis çalışdırıb. Transferlərə milyonlar gedib, amma hələ də komandanın güclənməyə ehtiyacı var. Birincisi, qapı. Nə Rza Cəfərov, nə Emil Balayev, nə də Kenan Piriç iddialı komandanın qapısını qoruyacaq gücdədi. Kenan heç deyil. Mütləq səviyyəli və inamlı qapıçı gətirilməlidi.

Sol cinah müdafiəçisi alınya yaxşı olar, alınmasa da, Mustafa Sekə şükür. Düzdü, səhvləri var. Amma sürəti, hücuma çıxmağı ilə bunu kompensasiya edə bilir.

Ötən mövsüm “Araz-Naxçıvan”ın gücünə güc qatan İqor Ribeyro fiaskodu. Bu qədər zəif olacağını heç kim düşünməzdi. Mütəq əvəz edilməlidi. Elvin Bədəlov da güvən vermir. Amma şübhəsiz, Ribeyrodan yaxşıdı. Riskləri sevmir, sadə oynayır.

Müdafiənin sağ cinahında bir Kristian Kostin var, bir də Falaye Sako. Biri o birindən betər. Bu futbolçuları həqiqətən də Samir Abasov gətiribsə, nə deyib gətirib? Nəyə, kimə lazımdılar?

Növbəti problemli nöqtə İmad Farajdı. Onun yerinə kimsə gəlməlidi. Farajın PR meneceri çox güclü imiş, “Neftçi”yə yaman badalaq gəldi.

Piriç, Ribeyro, Sako, Kurçi, Kuç, Camalov, Faraj kimi futbolçular getsə, büdcənin yükü də azalar.

MÜZƏFFƏR QULUZADƏ