23–27 dekabr tarixlərində Monteneqro Futbol İttifaqının (FSCG) Məşqçilərin Təhsili Mərkəzinin proqramı çərçivəsində UEFA A lisenziyası almaq üçün nəzərdə tutulan dörd moduldan birincisi keçirilib.

"Football-plus.az" xəbər verir ki, dinləyicilər məşqçi peşəsi üçün zəruri bacarıqlarını inkişaf etdirmək məqsədilə CET FSCG-nin mühazirəçiləri və təlimçiləri tərəfindən hazırlanmış nəzəri və praktiki məşqçilik təcrübələri ilə məşğul olublar. Tədris prosesi çərçivəsində iştirakçılar Monteneqrodan və xarici ölkələrdən olan təcrübəli mütəxəssislərin mühazirələrini dinləmək imkanı əldə ediblər.

Kursda Monteneqronun hazırkı və keçmiş 18 milli futbolçusundan ibarət qrup iştirak edib. Onların arasında "Qarabağ"ın yarımmüdafiəçisi Marko Yankoviç və Ağdam təmsilçisinin sabiq müdafiəçisi Marko Veşoviç də olub.

Bütün modullar uğurla başa çatdırıldıqdan və diplom işinin müdafiəsindən sonra namizədlərə UEFA A lisenziyası təqdim olunacaq. Bu diplom məşqçilərə daha yüksək səviyyələrdə, o cümlədən gənclər və əsas komandalarla işləmək imkanı verir. Həmçinin UEFA A lisenziyasının əldə edilməsi məşqçiləri peşəkar inkişaflarını davam etdirərək məşqçilik təhsilinin ən yüksək pillə sayılan UEFA Pro diplomuna doğru irəliləməyə təşviq edir.