Xankəndidə 11-ci Vüqar Həşimov Memorial turnirinin açılış mərasimi keçirilib.

"Football-plus.az" xəbər verir ki, ilk olaraq Azərbaycan Respublikasının Dövlət Himni səsləndirilib. Daha sonra yarışın coğrafiyası ilə bağlı videoçarx qonaqlara nümayiş etdirilib.

Ardınca Azərbaycan Respbulikası Prezidemtinin Xankəndi, Ağdərə və Xocalı rayonları üzrə xüsusi nümayəndəsinin müavini Səbuhi Qəhrəmanova söz verilib. Qəhrəmanov mərhum şahmatçı Vüqar Həşimovla bağlı danışıb. O, Həşimovun dünya miqyasında qazandığı addan və beynəlxalq arenalarda əldə etdiyi uğurlardan söz açıb. Həşimovun xatirəsinə həsr olunan turnirin davamlı olacağına inandığını söyləyən nümayəndə, mötəbər yarışın işğaldan azad edilmiş Xankəndidə keçirilməsini isə önəmli hadisə olduğunu qeyd edib. Bu cür tədbirlərin ölkədə şahmatın inkişafına təkan verxiyini deyib və iştirakçılara uğurlar arzulayıb.

Ardınca Azərbaycan Şahmat Federasiyasının prezidenti Mahir Məmmədov çıxış edib. Qurum rəhbəri Vüqar Həşimov turnirinin Azərbaycan şahmatının inkişafına verdiyi töhfədən danışıb. O, yarışın Xankəndi şəhərində keçirilməsini də önəmli hadisə adlandırıb. Məmmədov mərhum şahmatçı ilə bağlı xatirələrini də bölüşüb. O, Həşimovun Avropa çempionu, "Qran-Pri" qalibi olmasından söz açıb. AŞF rəhbəri Memorialın öz ənənələrinin olduğunu və bu turnirin yüksək səviyyədə təşkil olunmasını qeyd edib. O, mərhum qrossmeystrin xatirəsinin həmişə yad olunacağını vurğulayıb. Sonda bütün iştirakçılara uğurlar arzulayıb.

Ardınca Vüqar Həşimov Şahmat Fondunun banisi, uzun illər Vüqar Həşimov Memorialının təşkilat komitəsinin sədri olan Qasım Həşimovun xatirəsi bir dəqiqəlik sükutla yad edilib. Daha sonra Q.Həşimova həsr olunan videoçarx nümayiş olunub.

Ardınca çıxış üçün söz təşkilat komitəsinin sədri Sərxan Həşimova verilib. Həşimov bu memorialın baş tutmasının birgə səyin nəticəsi olduğunu deyib. Əsas işin Qasım Həşimovun yolunu davam etdirmək olduğunu deyən Həşimov təşkilatçılarla birgə çalışdıqlarını qeyd edib. S.Həşimov tədbirin Xankəndidə keçirilməsini böyük hadisə adlandırılıb. Daha təşkilat komitəsinin sədri 11-ci Vüqar Həşimov Memorial Turnirini açıq elan edib.

Sonda isə yarışın baş hakimi Rauf Hacılıya söz verilib. Baş hakim yarış haqqında məlumat verdikdən sonra püşkatma mərasimi keçirilib.

Püşkatmadan sonra ilk görüşlər keçirilib.