Gələnilki dünya çempionatının final mərhələsinin dünən Vaşinqtonda keçirilən püşkatma mərasimini başdan-sona izlədim.

Sadəcə, qəzetə və sayta təcili nəticəni qoymaq lazım idi, yoxsa mən artıq belə mərasimlərə baxmaq həvəskarı deyiləm; həm o yaş o yaş deyil, həm də özümüzün olmadığımızın məclisin texniki detalları nə dərəcədə cəlebedici ola bilər ki?!

Sanki uzaq bir kənddə toy çalınır, sən də “yüngül iş” üçün həyətə çıxıbsan, göyə baxırsan və uzaqdan hansısa mahnının sədası qulağına çatır. Biz bu futbol bayramında yadıq, özgəyik, adımız it dəftərində yoxdu, mundial iştirakçılarının sayı nə qədər artırılır-artırılsın, o səbətlərin birinə düşən deyilik. Hə, səbətdən söz düşmüşkən…

Hər səbətdə yer alan komandaların adı çəkilərkən həmin yığmanın oyunundan maraqlı anlar, qollar, qol sevinci də göstərilirdi. Türkiyə hələ ki püşkatmanın qiyabi iştirakçısı idi, amma mən özbək qardaşlarımıza görə əməllicə sevindim, Allah qismət etsə, gələn yay oyunlarına baxmağı planlaşdırdığım komandalardan biri də Özbəkistan yığması olacaq.

Püşkatmadan sonra görürəm ki, ölkəmizdə əsasən iki fikir hökm sürür. Birincisi odu ki, DÇ-də komanda sayı artırıldı, mənasız oyunların sayı artdı, belə turnirə görə yuxumuza haram qatmağa dəyməz. Belələrinə demək istəyirəm ki, qardaş-bacı, baxmırsız-baxmayın da, guya o 48 komanda arasına düşə, o səbətə girə bilirik ki, hələ oyunları “mənalı” və “mənasız” kateqoriyalarına da ayıraq.

İkinci baxış-mülahizə də var: görəsən, biz nə vaxtsa mundialın final mərhələsində olacaqmı? Açığı, püşkatma gedə-gedə bir daha pasportuma baxdım, sanki ürəyimdəki ana damarlardan biri tıxandı, nəfəs almaq çətinləşdi, sonra köks ötürdüm, sağıma baxdım D liqasında yarışacaq Azərbaycan yığmasını gördüm, soluma baxdım legioner limitinin olmadığı premyer-liqanı gördüm, önümə baxdım Saşa İliçlə münasibətləri elə meydanda aydınlaşdırmaq istəyən Ayxan Abbasovu gördüm.

Daha arxaya baxmadım. Keçdim kompüterin arxasına, Mahsun Kırmızıgülün yanıqlı “Kardeşlik türküsü”nə qulaq asmağa başladım:

Dağlar oy-oy-oy
Yollar oy-oy-oy
Kardeş oy-oy-oy

ORXAN