Uzun illər ''Real''ın şərəfini qorumuş və İspaniya yığmasının heyətində böyük uğurlar qazanmış Serxio Ramos ilə bağlı müxtəlif şayiələr yayılıb.

Bu da təsadüfi deyil. Onun sonuncu klubu Meksika təmsilçisi ''Monterrey'' ilə müqavilə müddəti yanvarın 1-də başa çatacaq.

Tərəflərin yeni müqavilə imzalayacağı gözlənilmir. Karyerasını başa vurmağa tələsməyən 39 yaşlı dünya çempionu Avropaya qayıtmaq arzusundadı. Ona maraq göstərən klublardan biri ''Qalatasaray''dı. İddialara inansaq, Ramos DÇ-2026-da iştirak etmək istəyir. Bunun üçün o, göz önündə olan bir çempionatda və Çempionlar Liqasında çıxış edən bir klubda oynamaq istəyir. ''Qalatasaray'' ona bu fürsəti verə bilər.

Üstəlik İstanbul nəhəngi özü də müdafiədəki rotasiyanı genişləndirmək üçün qışda bir mərkəz müdafiəçisi transfer etmək istəyir. Ona görə də tərəflərin qısa müddətli bir anlaşma əldə edə biləcəyi istisna edilmir. Ancaq Ramosa ''Nyukasl'', ''Sevilya'' və ''Komo'' başda olmaqla Avropadan bir çox klub maraq göstərir. Ramos 6 aylıq yox, ən azı ilyarımlıq müqavilə tələb edir.

Şayiələrə görə ona Türkiyədən adı çəkilməyən başqa klublar da maraq göstərir. 2025-in fevralından ''Monterrey''in şərəfini qoruyan Ramos indiyə qədər bu klubda 30 rəsmi oyunda 7 qol vurub.