Misli premyer-liqasında mövsümə uğursuz başlayan “Karvan-Yevlax”da vəziyyət pisdi.

Komandanın mövsümün bəlkə də ən vacib matçında da uduzması uzun müddətdi davam edən söz-söhbəti bir qədər də alovlandırıb. Bəli, söhbət Misli premyer-liqasının 12-ci turu çərçivəsində “Kəpəz”ə qarşı keçirilən matçdan gedir. Axı uzun müddətdən sonra Yevlax şəhər stadionunda baş tutan ilk premyer-liqa matçı meydan sahiblərinin 1:2 hesablı məğlubiyyəti və turnir cədvəlinin sonuncu sırasına düşməsi ilə nəticələndi.

İndi bəzi həmkarlarımız baş məşqçi Azər Həşimovun vəzifəsindən ayrıldığı, yerinə Füzuli Məmmədovun təyin olunduğunu, hətta komandanı məşqlərə çıxardığını yazır. İş ondadı ki, Azər bəy özü “Report”a açıqlamasında nəinki istefa vermədiyini, hətta maya qədər işinin başında olub komandanı premyer-liqada saxlamaq niyyətində olduğunu deyib.

İndi gəl bu işdən baş çıxar da, ay Kənan... Yox, “Karvan-Yevlax”ın başı övladının toyuna qarışan vitse-prezidenti Kənan Kərimovu nəzərdə tutmuram. Allah xoşbəxt eləsin! Özümü deyirəm. Axı vəziyyət o qədər qarışıqdı ki, “Karvan-Yevlax”ın baş məşqçisinin Azər Həşimov, yoxsa Füzuli Məmmədov olduğunu dəqiqləşdirmək müşkülə çevrilib.

Zəng et, öyrən də?! Vallah, əziz oxucu, nə Kənan Kərimov zənglərə cavab verir, nə Azər Həşimov, nə də klubun mətbuat xidmətinin rəhbəri Bəhruz Musayev. Füzuli Məmmədovu isə tapmaq müşkülə çevrilib. Özünün harda olduğunu bilməsək də, əlaqə nömrəsinin əhatə dairəsi xaricində olduğundan xəbərdarıq.

Siz Allah, çıxın cavab verin, görək “Karvan-Yevlax”ın baş məşqçisi kimdi?!

KƏNAN BAHADIR