Azərbaycanın yeniyetmə şahmatçıları Monteneqronun Budva şəhərində keçirilən Avropa çempionatında üç medal qazanıb.

14 yaşlı oğlanların kateqoriyasında Xaqan Əhməd 7,5 xal toplamaqla 1-ci yeri tutub. 9 turdan sonra iki şahmatçının xalı eyni olub. Əlavə əmsallara görə Xaqan 6-cı turda məğlub etdiyi erməni Tiqran Ambartsumyanı qabaqlayaraq 116 şahmatçı arasında birinci yerə layiq görülüb və Avropa çempionu titulunu əldə edib.

10 yaşlı qızların yarışında Mehriban Əhmədli 9 turda 7,5 xal toplayaraq gümüş medala layiq görülüb. 16 yaşlı qızların birinciliyində isə Məryəm Ağaverdiyeva 9 partiyada 7 xalla Avropa çempionatının bürünc medalını qazanıb. Daha iki şahmatçımız mötəbər yarışı ilk “5-lik”də bitirib. 16 yaşlı oğlanların mübarizəsində Rüstəm Rüstəmov, 8 yaşlı oğlanların yarışında isə Kənan Babasoy yekunda 2-5-ci yerləri bölüşüb. Bir qızıl, bir gümüş və bir bürünc medal qazanan Azərbaycan komanda hesabında 48 ölkə arasında 5-ci olub.

Bağlanış mərasimində qalib və mükafatçılara medal, kubok və diplomlar verilib. 14 yaşlı oğlanların mübarizəsində qızıl medal qazanan Xaqanın şərəfinə Azərbaycanın Dövlət Himni səsləndirilib.

Qeyd edək ki, turnirdə 48 ölkədən 1169 şahmatçı mübarizə aparıb.