Araz-Naxçıvan – Karvan-Yevlax 2:1 (0:1)
94. Tərlan Əhmədli – 6,0
77. Bruno Franko – 6,0
17. İssuf Paro – 5,5
29. Vanderson Melo – 6,0
26. Ömər Buludov – 5,0
(34. Urfan Abbasov, 56) – 5,0
6. Patrik Andrade – 5,5
2. Qara Qarayev (k) – 5,0
(8. Coşqun Diniyev, 46) – 5,0
10. Felipe Santos – 7,0
19. Bar Kohen – 5,0
(14. Ülvi İsgəndərov, 46) – 6,5
70. Şarl Boli – 4,5
(16. Ramon Maçado, 25) – 5,5
11. Ba-Muaka Simakala – 5,0
(7. Hamidu Keyta, 46) – 6,5
Ehtiyat oyunçular
12. Kristian Avram
76. Süleyman Həsənov
5. Slavik Alxasov
22. Elçin Mustafayev
24. Mustafa Əhmədzadə
23. Nuno Rodriges
Baş məşqçi: Elmar Baxşıyev
Komandanın ən yaxşısı: Felipe Santos

1. Kamran İbrahimov – 5,5
(25. Əmrah Bulud, 78) – qiymətsiz
13. Vüsal Məsimov – 5,5
(37. Mois Nqvisani, 75) – 5,0
21. İmani Barker – 5,5
32. Elvin Yunuszadə - 5,0
(4. Olavale Doyeni, 64) – 5,0
33. Eltun Turabov – 5,0
2. Şakil Sno – 5,0
11. Kayl Spens – 5,5
19. Tompson Qavi – 5,5
6. Vadim Abdullayev – 4,5
10. Samuel Durrant – 5,0
(8. Peter Kinqs, 75) – 5,0
7. Araz Abdullayev (k) – 6,0
(14. Uğur Cahangirov, 75) – 5,0
Ehtiyat oyunçular
42. İbrahim Qədirzadə
22. Qabil Əlizadə
77. Əli Abdullayev
5. Nika Çaçaşvili
12. Vitor Roşa
Baş məşqçi: Azər Həşimov
Komandanın ən yaxşısı: Araz Abdullayev

Qollar: A.Abdullayev, 16 (0:1, T.Qavi). H.Keyta, 65 (1:1, Ü.İsgəndərov). F.Santos, 90+2-p. (2:1).
Vərəqələr: R.Maçado, 57 (qeyri-idman hərəkəti). İ.Barker, 59 (oyunun bərpasının ləngidilməsi). A.Abdullayev, 69 (hakimin qərarına etiraz). Ü.İsgəndərov, 70 (qeyri-idman hərəkəti). V.Abdullayev, 90 (qeyri-idman hərəkəti) – sarı.
Hakimlər: NİCAT İSMAYILLI, Vüsal Məmmədov, Kərim Zeynalov, Kamran Əliyev (hamısı Bakı).
VAR hakimi: Əli Əliyev (Bakı).
VAR hakiminin köməkçisi: Şirmamed Mamedov (Bakı).
Hakim-inspektor: Ceyhun Haşımov (Bakı).
AFFA nümayəndəsi: Zaur Hacıməhərrəmov (Bakı).
8 noyabr. Sumqayıt. Mehdi Hüseynzadə adına Sumqayıt şəhər stadionu. 120 tamaşaçı (9502 yerlik).
Birinci hissəyə 5, ikiinci hissəyə 9 dəqiqə əlavə olunub.
Oyunun qiyməti: 6,0.

Son üç turda itirdiyi xallar üzündən avrokuboklar uğrunda mübarizədə nəinki şanslarını azaldan, hətta ilk “dördlük”dən kənarda qalan “Araz-Naxçıvan” bu matçda da qələbə qazanmasa, millinin oyunlarıyla bağlı fasiləyə yetərincə gərgin ab-havada yollanacaqdı.

Məhz bu məqam “Karvan-Yevlax” üçün də keçərliydi. Ona görə ki, Azər Həşimovun premyer-liqada qalmaq uğrunda tər tökən komandası mövsümün yegənə qələbəsini ikinci turda qazanıb. İndi tilsimi qırmaq, “Sumqayıt”a uduzduğuna görə yerində saymağa məcbur olan “Qəbələ”ni qabaqlamaq üçün ən azı bir xal qazanmaq vaxtı idi.

İnsafən, Yevlax təmsilçisinin ilk başda bu yöndə ümid verdiyini vurğulayaq. Hər halda, qonaqlar matça güclü rəqibindən daha istəkli başladı. O başqa məsələ ki, ilk təhlükəli vəziyyətin həyəcanını yaşamaq üçün bir qədər gözləməli olduq. Nəhayət, 13-cü dəqiqədə Qavi cərimə meydançasının həndəvərindən bəxtini sınadı ki, qeyri-dəqiq zərbə ilə yadda qaldı. Əslində ikinci hücum cəhdini “Araz-Naxçıvan”ın ifasında izləyə bilərdik. Ancaq “Karvan-Yevlax” Simakalanın Boliyə göndərmək istədiyi topun ünvana çatmasına imkan vermədi. Daha dəqiqi, irəli atılan Durrant dərhal Qavini “gördü”. Xeyli məsafə qət etdikdən sonra Araza ötürmə verən nigeriyalı 16-cı dəqiqədə komanda yoldaşının hesabı açmasına yardım etdi. Abdullayev Paro və Franko cütlüyünün mane olmaq cəhdlərinə rəğmən, ənənəvi üslubunda baxımlı qola imza atdı.

“Qırmızı-ağlar”ın “cavab atəşi” də özünü çox gözlətmədi. Patrik adını tabloya yazdırmaq istəyirdi ki, Kamranı “nişan aldı”. Andradenin 21-ci dəqiqədə təsadüf edən zərbəsi isə topun tirin üstündən şütüməsiylə nəticələndi. Ardından “Karvan-Yevlax”ın fərqi artırmaq fürsətini boşa verdiyi anları izlədik. Buna Tompsonun qeyri-dəqiqliyi səbəb oldu. “Araz-Naxçıvan”ın hesabı bərabərləşdirməsi üçün əlverişli imkan 29-cu dəqiqədə ələ düşdü. Santos – Maçado – Kohen kombinasiyası uğurla başa çata bilərdi ki, Barkerin həlledici müdaxiləsi qeydə alındı. Topu Kohenin ayaqlarından “oğurlayan” fransalı komandasının üstünlüyünü qorudu.

Bir qədər sonra Patrik və Ömər rəqibə təhlükəli anlar yaşatdı. Ancaq Andrade qeyri-dəqiq zərbəylə yadda qaldısa, Buludov Kamran səddini aşa bilmədi. 36-cı dəqiqədə Tərlan Muxtar Respublika təmsilçisinin qəhrəmanına çevrildi. O, buna Spensin “çərçivə”yə tuş gələn zərbəsini barmaqlarının ucuyla zərərsizləşdirməklə nail oldu. Birinci hissə Tompsonun növbəti cəhdi qeyri-dəqiqlik üzündən puç etməsindən sonra bitdi. Beləliklə, qonaqlar fasiləyə üstün yollandı.

Elmar Baxşıyev ikinci yarıya dəyişikliklərlə başladı. Qara, Kohen və Simakalanı, uyğun olaraq, Coşqun, Ülvi və Keyta ilə əvəzləyən mütəxəssisin arzusu komandasının hücumlarda daha effektiv çıxış etməsiydi. Belə də oldu: Ülvi hələ 48-ci dəqiqədə varlığını hiss etdirdi ki, top tirin üstündən keçdi. Bu mənada onun 52-ci dəqiqədə cərimə meydançasında qərarlaşan Ömərə verdiyi ötürməni də vurğulamalıyıq. Axı Buludovun qeyri-dəqiq zərbə ilə yadda qalması Ülvinin günahı deyil.

Hər halda, Baxşıyev qısa müddətdə istəyinə çatdı: 65-ci dəqiqədə Keyta Ülvinin ötürməsi sayəsində yaxın məsafədən topu tora qovuşdurdu. Bundan sonra komandaların sakit məcrada davam edən mübarizəsinə şahidlik etdik. Daha çox mərkəzdə davam edən matçda sükutu “Araz-Naxçıvan”ın tutarlı hücumu pozdu. 82-ci dəqiqədə qeydə alınan epizodda qonaqların bəxti gətirdi desək, yanılmarıq. Ona görə ki, Maçadoyla Ülvinin ardıcıl zərbələri tirdən qayıtdı.

Oyunun taleyini həll edən qol isə penaltidən vuruldu. Buna Vadimin Keytanın zərbəsinin qarşısını qoluyla kəsməsi səbəb oldu. Belədə 90+2-ci dəqiqədə topun arxasına keçən Santos “qırmızı-ağlar”a qələbə qazandırdı. Azər Həşomovun başı üzərində dolanan buludlar get-gedə sıxlaşır...

Gözdən qaçmadı
Santos penaltini qapı arxasındakı topdaşıyan azyaşlının göstərdiyi nöqtəyə zərbə endirməklə yerinə yetirdi. Melo komandası adından həmin uşağa təşəkkür etdi.

KƏNAN BAHADIR