DÇ-2026-ın seçmə mərhələsində Fransaya 1:3 uduzan yığmamızın baş məşqçisi Ayxan Abbasov oyundan sonra media önünə çıxıb.

- Azarkeşlərə təşəkkür edirəm. Çoxdan milli komandaya belə dəstək olmurdu. İstəyirdik ki, futbolçular inamlı olsunlar. Köklənmişdik, qələbə qazanmaq istəyirdik. Yaxşı başladıq, qol vurduq. Şahruddinin zədəsi də təsir etdi. Üçüncü qolda kömək edə bilmədi. Futbolçulara təşəkkür etmək istəyirəm. Nəticə istəyiriksə, səbr etməliyik. İtkilərimiz çox idi. 5-6 əsas futbolçumuz oynamadı. Amma yeni futbolçular qazandıq. İrəli baxmalıyıq.

- Mustafa Əhmədzadə bu gün debüt etdi. Onu da qazandıq. Xəyaldan razı qaldız?
- Mustafanın yerinə təcrübəlilər var idi. Amma İslandiya ilə oyunda Emin olmasaydı, Mustafa startda oynayacaqdı. Onun böyük potensialı var. Xəyal əsas heyətdə oynamağı haqq edir. Xəyal millinin əsas futbolçularından birinə çevrildi.

- Bu tsikldə Azərbaycan millisi nəyə nail oldu?
- Bilirdik ki, qrup çətindi. Fransanın bu qrupda olması rezonans doğurdu. “Oser faciəsi”ni nümunə göstərib deyirdilər ki, getməsək, yaxşıdı. Bunlar futbolçulara inam verdi. Taktiki gedişlər, yaxşı oyun gördük. Yeni futbolçular qazandıq.

- Abbasın hücumda oynaması əvvəldən planlaşdırılmışdı, yoxsa oyun məcbur etdi?
- Şahruddini dəyişmək planda yox idi. Abdulla, Qismət çox yorğun idi. Renat çox yorulmuşdu, məcbur onu çıxardıq. Sağ cinahda da Abbas daha çox Qismətə kömək oldu. Orda autlar qazanırdıq.

- Millidə qalsaz, əsas hədəf nə olacaq? C divizionu, yoxsa uşaq futbolu?
- D divizionundan qalxmalıyıq. Problemlərimiz çoxdu. Bəlkə də heç vaxt bu qədər az seçim olmamışdı. Bunu oyunlardan əvvəl desəydim, səhv anlaşılardı. Sağ cinahda nə edəcəyimizi bilmirdik. Bu uzun söhbətdi. Qısa danışsaq, əl-ələ verməliyik. Futbolun inkişafı təkcə federasiyalıq deyil.

- Millidə sonrakı taleyiniz necə olacaq?
- Bir az səbr edək. Ağır oyunlar idi. Ukrayna ilə oyundan öncə 1 gün vaxtımız var idi. Çətin qrup idi. Oyundan-oyuna hücumdakı istəyimiz inkişaf etdi. Vaxt lazımdı. Bu suala da yaxın zamanda aydınlıq gələr.

- Fatih Terim, Qurban Qurbanov kimi məşqçilər iki yerdə işləyəndə alınmadı. Siz necə qərar verəcəksiz?
- Karpin iki yerdə işləyir. Davam etsək, bu məsələ müzakirə olunacaq. Marta qədər oyun olmayacaq. “Şamaxı”dakı işimi davam etdirməliyəm. Orda da öz öhdəliyim var. Səbr etməliyik.

- Rza Cəfərovu “Şamaxı”ya gətirib, Rikardo Fernandesə dəyişərsiz?
- Bəlkə Rikardonu “milliləşdirək”? (gülür)

- Dünən Sərxan Hacıyevlə nə söhbət edirdiz?
- Fransa ilə oyun haqda.

MÜZƏFFƏR QULUZADƏ