“Futbolçularım qələbə qazanmaq üçün hər şeyi etdi” – Qəzənfər Abbasov “Xankəndi”ni necə devirdi?
“Qaradağ Lökbatan”ın futbol üzrə ölkə çempionatının 2-ci liqasının evdə keçirilən 5-ci tur matçında “Xankəndi”ni məğlub edib (2:0) liderliyə yüksəldiyini xəbər vermişdik.
Qonaqların baş məşqçisi İbrahim Uzunca bunu meydan sahiblərinin matça yaxşı hazırlaşmasıyla əlaqələndirdi.
Bəs, “Qaradağ Lökbatan” tərəfi nəyin hesabına qələbə qazandığını düşünür? Komandanın baş məşqçisi Qəzənfər Abbasov “Football-plus.az”ın sualını belə cavabladı:
“Oyunun çətin olacağını bilirdik. Heç vaxt məğlubiyyət yaşamayan komandaya qalib gəldik. Bəli, futbolçuları matça yaxşı hazırlamışdıq. Rəqibi çox ciddi təhlil etmişdik. Zəif nöqtələrini bilirdik. Futbolçularım mübarizə apardı, qələbə qazanmaq üçün hər şeyi etdi. Onları təbrik edirəm. Bilirik ki, bundan sonra nəinki “Xankəndi”, bütün rəqiblərə qarşı oyunlar daha ağır keçəcək. Çünki birinci pillədə qalmaq, ora yüksəlməkdən daha çətindi. Mövqeyimizi əldən verməməliyik”.
Mütəxəssis sözlərinə futbolçuların arxayınlaşmasına imkan verməcəklərini də əlavə etdi:“Çempionatda yaxşı oyunçulardan qurulan 3-4 komanda var ki, onlara qarşı daha fərqli motivasiya ilə oynayırıq. Ancaq bundan sonra daha məsuliyyətli, diqqətli olmalıyıq. Burda məşqçilər korpusunun üzərinə də böyük yük düşür. Komandanı bütün oyunlara məksimum səviyyədə kökləmək lazımdı. Hansısa rəqibə yuxarıdan aşağı baxmaq olmaz. Onsuz da hər oyundan sonra futbolçularla danışırıq, səhvləri izah edirik. Bundan sonra daha məsuliyyətli olacağıq”.
Baş məşqçi komandasının liderliyə yüksəlməsində rəhbərliyin də rolunun olduğunu bildirdi:“Hər şey rəhbərlikdən başlayır. Sağlam düşüncəli idarəçi varsa, bu cür nəticələr qazanmaq mümkündü. Prezident Sadıq Sadıqov bizim üçün hər cür şəraiti yaradıb. Çempion olmaq üçün gücümüz var. O, futbolçuları başa düşür, çətinlikləri anlayır və işə qiymət verir”.
KƏNAN BAHADIR
Digər xəbərlər
