Dünən Zirədə cari mövsümün ən maraqlı oyunlarından biri keçirildi. Qəsəbə təmsilçisi “Neftçi” ilə heç-heçə etdi – 2:2. Əlbəttə, tabloda və tarixdə nəticə qalır. Amma Zirədə həm də elə hadisələr baş verdi ki…

“Forza Neftçi” 2-ci hissədə tribunada, demək olar ki, yox idi. Səbəb isə çoxlarına qaranlıq qaldı. Sosial şəbəkələrdə azarkeşlər bir-birindən bunun səbəbini soruşanda ya komandanın nəticəsinə görə olduğunu, ya da polislərin azarkeşləri uzaqlaşdırdığını deyirdilər. Bunlardan heç biri deyil.
İkinci hissənin əvvəlində tələbkar və çılğınlığı ilə tanınan “Forza Neftçi” komandaya haqlı iradını bildirdi. Bu isə xalqı qorumalı olan Azərbaycan polisinin xoşuna gəlmədi. Azarkeşlər bir neçə dəfə “ə, sakit durun, səs-küy salmayın” kimi ifadələr eşitdi. Azərbaycan polisi, ora tribunadı, ölkədə iki-üç səs-küy salmağı bacaran azarkeş qrupu var, sən də onların qarşısını alırsan. Niyə axı? Stadion teatr deyil ki, adamla düşüncəli görkəm alıb, yaşananları sakitcə izləsin.

Nəticə nə oldu? Bir neçə dəfə azarkeşlərlə polislər arasında anlaşmazlıq oldu və Azərbaycan polisi çıxış yolunu çevriliş, iğtişaş, mitinq halları üçün nəzərdə tutulan gözyaşardıcı qaz işlətməkdə gördü. Bir neçə azarkeş çox ciddi xəsarət aldı. Elə stadionun kənarında, yerə uzadılmış halda iki azarkeşi mən gördüm. Azarkeşlər yerdə az qala “can verərkən” onlara iynə vuruldu, özlərinə gəldilər və bölməyə aparıldılar. Dünən təxminən 9-a qalmış bölməyə aparılan azarkeşlər təxminən iki saat əvvəl buraxıldı.

Və şahidi olduğum daha bir hadisə. “Zirə”nin yaşlı azarkeşlərindən biri komandasını çılğınca dəstəklədiyinə, “səs-küy saldığına” görə yeniyetmə “Neftçi” azarkeşini əvvəlcə ağır şəkildə söydü, sonra əsəbini boğa bilməyib döydü. Az qala tribunadan meydana atacaqdı.

Bir sözlə, dünən Zirədə tam bir xaos hökm sürürdü – istər hakim qərarları, istərsə polisin davranışı baxımından!

MÜZƏFFƏR QULUZADƏ