Azərbaycanda keçirilən 3-cü MDB Oyunları yavaş-yavaş sona yaxınlaşır. 8-ci yarış günü də arxada qaldı. İlk iki Oyunlarda komanda hesabında 4-cü yeri tutan ölkəmiz, təbii ki, bu dəfə daha yüksək yerdə qərarlaşmaq niyyətindədi. Bəs medal sıralamasında vəziyyət necədi?

Rusiya 73 qızıl, 27 gümüş, 17 bürünc medalla zirvədədi. Yeniyetmə idmançılarımızın ruslara çatmaq imkanı yoxdu. Amma 2-ci yer uğrunda ölüm-dirim mübarizəsi gedir. Azərbaycanın Oyunları ikinci kimi bitirmək şansı yetərincə realdı. Belə ki, hazırda Belarusun hesabında 15 qızıl, 20 gümüş, 28 bürünc, Azərbaycanın hesabıbda 13 qızıl, 27 gümüş, 45 bürünc medal var. Cəmi iki qızıl medalla Belarusu arxada qoyacağıq. Həmin qızılları hardan tapmalı?

Bu gün güləş, karate, boks, cüdo, qılıncoynatma, güllə atıcılığı kimi idman növlərində qızıl qazanmaqla geriliyi aradan qaldıra bilərik. Üstəlik futbol yarışlarının finalı var. Azərbaycanın U-16-sı Rusiyadan olan həmyaşıdları ilə qarşılaşacaq. Nəhəng qonşunu futbolda məğlub etmək çox gözəl olardı. Bunu isə artıq Aqil Nəbiyev və yetirmələri bacarmalıdı!

ORXAN