"Qarabağ" sabah Çempionlar Liqasının 2-ci turu çərçivəsində "Kopenhagen"i qəbul edəcək.

"Football-plus.az" xəbər verir ki, Ağdam təmsilçisinin baş məşqçisi Qurban Qutbanov oyunöncəsi mətbuat konfransında jurnalistlərin suallarını cavabladı.

- Hər kəsi salamlayıram. Sevindirici haldı ki, Bakıda belə böyük turnirin ilk oyunu keçiriləcək. Çox sevincli, həyəcanlı və məsuliyyətliyik. Azərbaycanın hər bölgəsindən oyuna maraq var. Matça yaxşı hazırlaşmışıq. Bu gün də bunun üçün müəyyən vaxt var. Çox ciddi rəqibə qarşı oynayacağıq. İnanıram ki, futbolçularım oyuna çox ciddi yanaşacaq və azarkeşləri sevindirməyə çalışacaqlar.

- 2016-cı ilin avqustunda sizə məlum qol epizoduyla bağlı sual vermişdim. Növbəti gün "Qarabağ" həmin qolu vurmuşdu. Həmin o məlum epizoda sabah və ya növbəti oyunlarda rast gələ bilərikmi?
- Bütün rəqiblər buna hazırdı. O qədər təkrar olunub ki, rəqiblər bunu bilirlər. Hər şey ola bilər.

- Sabah gecə "Barselona" - PSJ matçı keçiriləcək. Amma ondan əvvəl dünyanın gözü "Qarabağ" - "Kopenhagen" matçında olacaq. Çünki "Benfika" üzərində qazanılan qələbə gözləntiləri artırıb. Komanda bu təzyiqə tab gətiə biləcəkmi?
- Bu cür hallar bizi sevindirir. Oyunumuza böyük maraq varsa, biz ancaq xoşbəxt ola bilərik. Bu cür hallar futbolumuza yatırım etmək istəyən insanları da həvəsləndirir. Futbol idmanın şahıdı. Bu gün ilk növbədə bu cür məqamları düşünərək meydana çıxmalıyıq. Futbolumuza, ölkəmizə dəyər verilməsində kiçik də olsa, pay sahibi olmaq istəyirik. Futbolumuz sizin, azarkeşlərimizin inamı, ümidi sayəsində var. Qorxumuz yoxdu. Əlbəttə, ilk dəqiqələrdə müəyyən təzyiq ola bilər. Ancaq bu, 90 dəqiqə davam etməməlidi. Yoxsa bizə problem yarada bilər.

- 2017-ci ildə Çempionlar Liqası matçları BOS-da keçirildi. Tofiq Bəhramov adına Respublika Stadionunun durumu necədi? Bu stadion komanda üçün daha rahatdı?
- Əsas Bakıda olmağımızdı. Bəlkə BOS-da da oyunları keçirə bilərdik. Təbii ki, hazır vəziyyətdə olsaydı... Geniş arenanı Avropaya göstərməyimiz faydalı iş olardı. Bəli, meydança amili rol oynayır. Ancaq oyunlar BOS-da da keçirilsə, məsuliyyət eyni qalacaqdı.

- Stadionun ot örtüyünün durumu necədi?
- Normaldı. Yaxşı görünməsə də, həmişə razı qalmışıq. İqlimdən də çox şey asılıdı. Əvvəlki illərlə müqayisədə daha yaxşı vəziyyətdədi.

- Marko Yankoviçin əvəzinə hansı futbolçu oynayacaq?
- Təxmini bilirəm. Amma yenə də axşamkı məşqdə dəqiq qərar verəcəm.

- 2017-ci ildəki "Kopenhagen"lə indiki arasında hansı fərq var?
- Bu klubun üstünlüyü ondadı ki, öz oyun fəlsəfəsindən əl çəkmir. 2017-ci ildən bu yana sistemlərində demək olar ki, dəyişiklik olmayıb. Çox nadir hallarda bəzi rotasiyalar edirlər. Çalışırlar ki, sistemlərini daha da təkmilləşdirsinlər. Bu da onların sabit nəticələr qazanmalarına səbəb olur. İndi daha texnikalı oyunçuları var. Klubun fəlsəfəsi isə həmişə yerindədi.

- "Qarabağ" "Kopenhagen"ə qalib gəlməyin yolunu tapıb?
- İstənilən rəqibə qalib gəlmək üçün hazırlaşırıq. Rəqibdən də çox şey asılıdı. Bacardığımız qədər hazırlaşmışıq. Çalışacağıq ki, qalibiyyət üçün əlimizdən gələnin artığını edək. Ancaq qarşımızda "Kopenhagen" var. Rəqibin göstərəcəyi oyuna hazır olmalıyıq.

- “Kopenhagen”lə oyunu xatırlayırsız? Rəqib sizin üçün hansısa problemləri yarada bilər?
- Həmişə çox istəmişəm ki, Bakıdakı matçlarda qonaqlar çox olsun, xüsusilə də media nümayəndələri. Bakımızla, ümumiyyətlə, Azərbaycanla yaxından tanış olsunlar. Kopenhageni çox bəyənmişdim. Xatirimdə qalan ən öndə olan şəhərlərdən biridi. Rəqibin üstün cəhətləri çoxdu. Rəqibin nə etmək istədiyini biləndə, qarşısını almaq asandı. Təhlillər edib komandaya demişik. Sabah meydanda taktiki savaş gedə bilər. Hər halda böyük istəklə, böyük diqqətlə oynayacağıq. "Kopenhagen"lə matçda nəticədən asılı olmadan, oyundan həzz ala bilərəm. Rəqibin bəzi dəyişiklikləri, sürətli hücumları, mövqe hücumları bizə problemlər yarada bilər. Hamımız 90 dəqiqə ərzində diqqətli olmalıyıq ki, bizim üçün problem yaranmasın.

KƏNAN BAHADIR