“Liverpul” qələbələri sıralayır, izləyiciləri xal itirir - icmal
Bu gedişlə premyer-liqada çıxış edən komandaları tezliklə iki qrupa böləcəyik: “Liverpul” və başqaları. “Qırmızılar” hesabat turunda “Everton”u məğlub etməklə ardıcıl qələbələrin sayını 5-ə çatdırdı.
Turda iki önəmli oyun var idi. “Arsenal”la “Mançester Siti” meydandan “sülh”lə ayrıldısa, “Mançester Yunayted” “Çelsi”ni məğlub etməklə qəddini düzəltdi.
“Liverpul” derbiyə çox inamlı başladı. “Everton”un oyunla bağlı planını anlamaq çətin idi. Bütün komanda ilə geri çəkilən “göylər” meydanın rəqibə aid hissəsinə keçmək istəmirdilər. “Liverpul”un təzyiqi artıq 10-cu dəqiqədə Qravenberxin vurduğu qolda əksini tapdı. 29-cu dəqiqədə isə Ekitike fərqi artırdı. Görünür, bu iki qol “qırmızılar”ı hədsiz tez arxayınlaşdırdı. Bu üzdən “Everton” 2-ci hissədə təşəbbüsü ələ keçirdi. Geyenin saatın tamamında vurduğu qol hadisələrin axarına uyğun idi. Fərq azalandan sonra “qırmızılar” əsəbi oyun göstərməyə başladı, “Everton” isə təzyiqi artırdı. Hər halda, çempion hesabı qoruya, qələbə yürüşünü davam etdirə bildi.
Ötən tur mankunian derbisində darmadağın olan “Mançester Yunayted” bu dəfə “Çelsi”ni qəbul etdi. Artıq debütdə həlledici hadisə baş verdi: Sançes cərimə meydançasını tərk edərək topu onun yanından atıb qaçmaq istəyən Mbemonu yıxdı. “Çelsi”nin qapısına cərimə zərbəsi təyin olundu və qapıçısı qovuldu. Meydan sahibləri tezliklə say üstünlüyündən yararlandı: Fernandeş Sançesin qapıdakı yerini tutan Yorgenseni məyus etdi. 37-ci dəqiqədə Kazemiro da rəqib qapısına yol tapdı. Düzdü, fasilə ərəfəsində meydandakı oyunçuların sayı bərabərləşdi. Artıq “sarı”sı olan Kazemiro Santosa qarşı kobud oynamaqla vaxtından əvvəl paltardəyişmə otağına yollandı. Yalnız bundan sonra “Çelsi”də oyunu xilas etməklə bağlı müəyyən ümidlər yarandı. Hərçənd yağış üzündən topun çətinliklə hərəkət etdiyi meydanda yaradıcı oyun göstərmək çətin idi. Fofana künc zərbəsindən sonra fərqlənsə də, hakim ofsayd qeydə aldı. 80-ci dəqiqədə yerinə yetirilən künc zərbəsi isə Çalobanın dəqiq baş zərbəsi ilə bitdi. Bu qol “Çelsi”ni oyuna qaytardı. Ancaq “zadəganlar”ın sondakı hücum dalğası məğlubiyyətdən qurtulmağa imkan vermədi.
Komandaların turnir cədvəlindəki mövqeyini nəzərə alsaq, əslində turun mərkəzi oyunu “Arsenal”ın “Mançeter Siti”ni qəbul etdiyi qarşılaşma idi. “Emireyts”ə toplaşanlar erkən qol gördü. “Şəhərlilər” artıq 9-cu dəqiqədə hesabı açdı və bu qol oyunun sonrakı axarını müəyyənləşdirdi. “Siti” özünə xas olmayan şəkildə topu və ərazi üstünlüyünü rəqibə verərək dərin müdafiəyə çəkildi, nadir əks-hücumlara bel bağladı. Bu taktika müəyyən mənada özünü doğrultdu, çünki “topçular” böyük təzyiqə rəğmən, müntəzəm təhlükəli vəziyyət yaratmaqda çətinlik çəkirdi. Qvardiola 2-ci hissənin gedişində müdafiəni bir qədər də möhkəmlətdi, bu isə oyuna baxanlarda ancaq təəccüb doğururdu. Nəhayət, uzatma dəqiqələrində hesab bərabərləşdi. Artetanın 80-ci dəqiqədə meydana buraxdığı Martinelli komandasını məğlubiyyətdən xilas etdi.
Turun qalan oyunlarına gəlincə, “Tottenhem” cari mövsümdə ilk dəfə heç-heçə oynadı. “Mahmızlar” “Brayton”la səfər oyununda məğlubiyyətdən qaça bildi – 2:2. “Kristal Pelas” və “Lids” səfərdən uğurlu nəticə ilə döndü. “Qartallar” London derbisinə “Vest Hem”i məğlub etdi, “Lids” isə aşkar autsayder “Vulverhempton”dan üstün oldu. “Fulhem” “Brentford” üzərində əzmkar qələbə qazandı. “Bernli” ilə “Nottingem Forest” qalibi müəyyənləşdirə bilmədi. “Sanderlend” – “Aston Villa” oyunu da 1:1 bitdi, baxmayaraq ki, meydan sahibləri 33-cü dəqiqədə azlıqda qalmışdı. Yalnız “Bornmut” – “Nyukasl” oyununda qapılara qol vurulmadı.
5-ci tur
Liverpul – Everton 2:1
Qravenberx, 10. Ekitike, 29 – Geye, 58. (60342)
Liverpul: Alisson, Bredli, Konate, Van Diyk, Kerkez, Qravenberx, Makallister (Cons, 61), Salah, Soboslai, Qakpo (Virts, 61), Ekitike (İsak, 61).
Mançester Yunayted – Çelsi 2:1
Fernandeş, 14. Kazemiro, 37 – Çaloba, 80.
MY: Bayındır, Mazraui (Kunde, 65), De Liqt, Maquayr (Yoro, 70), Dorqu, Kazemiro, Fernandeş (Maynu, 87), Şou, Mbemo (Maunt, 69), Dyallo, Şeşko (Uqarte, 46).
Çelsi: Sançes, Ceyms, Çaloba, Fofana (Corc, 64), Kukurelya (Hüsto, 64), Fernandes, Kaysedo, Estevao (Yorgensen, 6), Palmer (Santos, 21), Neto (Adarabioyo, 7), Pedro.
Arsenal – Mançester Siti 1:1
Martinelli, 90+3 – Holann, 9. (60161)
Arsenal: Rayya, Timber (Martinelli, 80), Saliba, Qabriel, Kalafyori, Merino (Eze, 46), Subimendi (Moskera, 90+8), Rays, Madueke (Saka, 46), Dyökereş, Trossar (Nvaneri, 84).
MS: Donnarumma, Xusanov (Nunyeş, 46), Diaş, Qvardiol, O’Rayli (Stounz, 87), Rodri, B.Silva, Foden (Ake, 68), Reynders, Dokyu (Savinyo, 87), Holann (Niko, 76).
Brayton – Tottenhem 2:2
Mintex, 8. Ayyari, 31 – Rişarlison, 43. Van Hekke, 82-öz qapısına. (31488)
Tottenhem: Vikario, Porro (Spens, 89), Romero, Van de Ven, Udoci, Bentankur (Simons, 61), Palyinya, Berqvall (Qrey, 89), Kudus, Rişarlison, Odober (Conson, 72).
Bernli – Nottingem Forest 1:1
Entoni, 20 – Uilyams, 2. (21475)
Vest Hem – Kristal Pelas 1:2
Bouen, 49 – Mateta, 37. Mitçell, 68. (62455)
Vulverhempton – Lids 1:3
Kreyçi, 8 – Kalvert-Lüin, 31. Stax, 39. Okafor, 45. (30807)
Fulhem – Brentford 3:1
İvobi, 38. Uilson, 40. Pinnok, 50-öz qapısına – Damsqor, 20. (26113)
Bornmut – Nyukasl 0:0
(11212)
Sanderlend – Aston Villa 1:1
İzidor, 76 – Keş, 67. (46261)
1. Liverpul 5 5 0 0 11-5 15
2. Arsenal 5 3 1 1 10-2 10
3. Tottenhem 5 3 1 1 10-3 10
4. Bornmut 5 3 1 1 6-5 10
5. Kristal Pelas 5 2 3 0 6-2 9
6. Çelsi 5 2 2 1 10-5 8
7. Sanderlend 5 2 2 1 6-4 8
8. Fulhem 5 2 2 1 6-5 8
9. Mançester S. 5 2 1 2 9-5 7
10. Everton 5 2 1 2 6-5 7
11. Mançester Y. 5 2 1 2 6-8 7
12. Lids 5 2 1 2 4-7 7
13. Nyukasl 5 1 3 1 3-3 6
14. Brayton 5 1 2 2 6-8 5
15. Nottingem Forest 5 1 2 2 5-9 5
16. Bernli 5 1 1 3 5-8 4
17. Brentford 5 1 1 3 6-10 4
18. Aston Villa 5 0 3 2 1-5 3
19. Vest Hem 5 1 0 4 5-13 3
20. Vulverhempton 5 0 0 5 3-12 0
Bombardir: Holann (MS) – 6.
Növbəti turun oyunları sentyabrın 27-29-u aralığında keçiriləcək: Brentford – Mançester Yunayted, Kristal Pelas – Liverpul, Lids – Bornmut, Mançester Siti – Bernli, Çelsi – Brayton, Nottingem Forest – Sanderlend, Tottenhem – Vulverhempton, Aston Villa – Fulhem, Nyukasl – Arsenal, Everton – Vest Hem.
Turun rəqəmi
100 – Bruno Fernandeş MY-nin heyətində keçirdiyi 296-cı oyunda qol sayını bu həddə çatdırdı. Bu qolların 64-ü premyer-liqanın payına düşür. Portuqaliyalı yarımmüdafiəçi 100 qoldan 39-nu penaltidən vurub, hələ 5 penaltini də boşa verib. O, klub tarixinə 100 və daha artıq qol vuran 19-cu futbolçu kimi düşdü. MY-nin bu göstəricidə rekordçusu Ueyn Runidi (253).
Turun ulduzu
Rayan Qravenberx (Liverpul) – derbinin aparıcı fiqurlarından biri idi. Niderlandlı yarımmüdafiəçi Salahın ötürməsindən sonra hesabı açdı, ardından Ekitikeyə məhsuldar ötürmə verdi. Məhsuldar hərəkətləri öz yerində, böyük həcmdə “qara iş” də gördü.
Turun sitatı
Entso Mareska, “Çelsi”nin baş məşqçisi:
“Hakimin start fitindən cəmi 3 dəqiqə sonra göstərilən qırmızı vərəqə hər şeyi dəyişdi. Bu oyuna daha yaxşı başlamalıydıq. “Old Trafford”da oyun başlayandan cəmi 3 dəqiqə sonra “qırmızı”nı özünə rəva görmək olmaz”.
Faktlar
* Premyer-liqada 89-cu dəfə məhsuldar ötürmə verən Salah MY-nin sabiq yarımmüdafiəçisi Bekhemi bu göstəricidə arxada qoydu. Misirli ulduz indi 9-cu yeri Milnerlə bölüşür. Məhsuldar ötürmələrin sayına görə rekordçu isə Giqqzdi (162).
* “Çelsi” dəyişikliklərin sürətinə görə premyer-liqada yeni rekord müəyyənləşdirdi. 6-cı dəqiqədə Estevaonu Yorgensen, 7-ci dəqiqədə Netonu Adarabioyo, 21-ci dəqiqədə isə Palmeri Santos əvəzlədi. 21-ci dəqiqəyə qədər üç dəyişiklik premyer-liqa rekordudu.
* Kazemiro 14-cü dəqiqədə qol vurdu, 45+5-ci dəqiqədə qovuldu. Braziliyalı MY tarixinə premyer-liqada ilk yarıda həm qol vuran, həm də qovulan 1-ci futbolçu kimi düşdü. Liqanın tarixində sonuncu dəfə belə aqibətlə 2012-ci ildə “Arsenal”la oyunda “Tottenhem”in forvardı Adebayor üzləşmişdi.
* “Çelsi” 10 ildən artıqdı səfərdə MY-yə qalib gəlmir. Sonuncu belə qələbə 2013-cü il mayın 5-də qeydə alınıb. Həmin gün yeganə qolu Xuan Mata vurmuşdu.
* MS Qvardiolanın çalışdırdığı komandalar arasında topa yiyələnmə faizi baxımından antirekord müəyyənləşdirdi. Mankunianlar “Arsenal”la oyun vaxtının 33 faizində topa nəzarət etdi. Bu isə Qvardiolanın çempionat oyunları üçün antirekordudu. Onun komandaları əvvəlki 600 oyunda heç vaxt belə aşağı nəticə göstərməmişdi. Əvvəlki antirekord da “Arsenal”la oyunda qeydə alınmışdı – 2023-ün martında 37 faiz.
* MS Qvardiolanın dönəmində premyer-liqada ən pis startı gerçəkləşdirib. Bu tur heç-heçə edən “şəhərlilər” əvvəlki 4 oyunun ikisində qalib gəlib, ikisində uduzub. 5 turdan sonra 7 xal Qvardiolanın komandanı çalışdırmağa başladığı 2016-dan bəri ən pis nəticədi. MS buna qədər sonuncu dəfə 2006/07 mövsümündə startda 8-dən az xal toplamışdı – 5 oyundan sonra 4 xal.
* Arteta premyer-liqada Qvardiolaya qarşı ən yaxşə nəticə göstərən məşqçidi. O, liqanın tarixinə Qvardiolanın komandasına ardıcıl 5 oyunda uduzmayan ilk məşqçi kimi düşdü. “Topçular” bu oyunların 2-də qələbə qazanıb, 3-də heç-heçə edib.
Oyundan sonra
Arne Slot, “Liverpul”un baş məşqçisi:
“İlk yarıdakı oyunumuz xoşuma gəldi. Necə çətin olacağını bilirdik: son 7 gündə üç oyun, şənbə günü erkən start... Bu məqamlar oyunumuza təsir etdi. İlk yarıda qeyri-adi oyun göstərdik. Ancaq 2-ci hissədə yorğunluq özünü göstərdi və “Liverpul” bundan yararlandı”.
Ruben Amorim, MY-nin baş məşqçisi: “İndiki məqamda hər qələbə vacibdi, xüsusən də güclü rəqiblə oyunda. Sançesin qovulması dominantlığımıza yardım etdi, ancaq bunsuz da oyunun axarına diqtə edirdik. İki qol vurandan sonra özümüzə problem yaratmağa başladıq. Kazemiro hərəkətinin yolverilməz olduğunu anlayacaq dərəcədə təcrübəli futbolçudu. Sonda çətinlik çəksək də, qələbəni haqq etdik. Fanatlarımızı sevindirmək asandı, bütün gücünü qoyursansa, onlar səni dəstəkləyir. Futbolçularımız bunu anlamalıdı. Qələbənin bəxş etdiyi xoş duyğuları unudub, hər oyunda belə nəticəyə nail olmağın zəruriliyi haqda düşünməliyik”.
Pep Qvardiola, MS-nin baş məşqçisi: “Həftə ərzində “Mançester Yunayted”lə və Çempionlar Liqasında ağır oyunlar keçirdik. Bu gün isə güclü rəqiblə qarşılaşdıq. Oyunçularımın dəyanəti qarşısında şlyapa çıxarıram. Düşünürəm ki, nəticə ümumilikdə ədalətlidi, amma “Arsenal” bir qədər yaxşı oynadı. Bu gün bizə çətin idi, “Arsenal”ın zəruri olan hər şeyi var. Xal götürdük, yaxşı oynamaq lazımdı, ancaq reallıq belədi. Qeyri-adi dərəcədə yorulmuşduq. “Napoli” ilə oyun çox emosional keçdi, bir gün bərpa olunandan sonra London səfərinə 4-5 saat sərf etdik. Futbolçularımızın çoxu yorğun idi, üstəlik zədəlilərimiz də çoxdu. “Arsenal” son iki ildə premyer-liqada çempionluq uğrunda mübarizə aparıb, Çempionlar Liqasında yarımfinala qədər irəliləyib, yəni elə-belə rəqib deyil”.
Mikel Arteta, “Arsenal”ın baş məşqçisi: “Bir xal haqq etdiyimizin minimumudu. Futbolçularımla, oyunumuzla, hər aspektdə dominantlıq etməyimizlə qürur duyuram. Və qələbə qazana bilmədiyimizə görə çox məyusam. “Siti”nin cəmi üç təhlükəli vəziyyəti oldu, biri künc zərbəsindən sonra, o biri əks-hücumda, üçüncüsü də biz topu itirəndən sonra. “Siti”ni belə saxladıqlarına görə futbolçulara təşəkkür düşür. Düşünürəm ki, bu gün qalib gəldiyimiz ötən mövsümlə müqayisədə daha yaxşı oynadıq. Dəfələrlə yaxşı. Biz turnir cədvəlində “Liverpul”dan geriliyə nəzarət edə bilmərik, onlar hər oyunda qalib gəlir”.
Digər xəbərlər
