"Yerli məşqçi ilə işləmək daha rahatdı" - Emin Mahmudov
"Azarkeşlərə təşəkkür edirəm. Bizə motivasiya verdilər, möhtəşəm idilər. İlk oyunda 0:5 uduzsaq da, oyunumuza gəldilər, dəstək oldular".
"Football-plus.az" xəbər verir ki, bu sözləri millimizin kapitanı Emin Mahmudov DÇ-2026-nın seçmə mərhələsinin 2-ci turunda Bakıda Ukrayna ilə keçirilən oyundan (1:1) sonra jurnalisltərə açıqlamasında deyib.
Bu oyunda fərqlənməklə millidəki qol sayını 15-ə çatdıran və Qurban Qurbanovun rekordunu yeniləyən yarımmüdafiəçi bu barədə də danışıb:
"Bombardir olduğum üçün çox xoşbəxtəm, möhtəşəm hissdi Buna görə komanda yoldaşlarıma təşəkkür edirəm, Onlarsız bu rekordu yeniləyə bilməzdim".
Emin oyunda çox əziyyət çəkdiklərini bildirib:
"Çalışırdıq ki, maksimumu yerinə yetirək. Baş məşqçi Ayxan Abbasova təşəkkür edirəm ki, 0:5 hesablı məğlubiyyətdən sonra bizə motivasiya verdi. Komandanı psixoloji cəhətdən oyuna yaxşı hazırladı. Bir günə çox yaxşı işlər gördü".
Kapitan "müvəqqəti baş məşqçi Ayxan Abbasov millidə nəyi dəyişdi ki, nəticə qazandınız" sualını isə belə cavablandırıb:
"Bir günə çox şeyi dəyişə bilməzsən. Bizə motivasiya olmaq üçün bəzi sözlər dedi. Bəzi taktiki gedişlərdə də dəyişiklik etdi. Maksimum nə dəyişə bilərdisə onu da etdi. İnanıram ki, növbəti matçlarda da uğurlu nəticələr qazanacağıq".
Emin onu da deyib ki, millidə yerli məşqçinin işləməsi daha yaxşı olar:
"Yerli məşqçilərin işləməyi daha rahatdı. Çünki onlar futbolçuları, çempionatı yaxşı tanıyır. Ayxan müəllim bizi tanıdığına görə bir günə nəyisə dəyişə bildi. Mənim üçün kimin gəlməsi fərq etməz, amma yerli məşqçi ilə işləmək daha rahatdı".
O, millidə qol sayını daha da artırmaq istədiyini qeyd edib:
"İndi qol vurmaq məncə, daha rahat olacaq. Rekordu yeniləmək üçün lazım olan bir qolu çox gec vurdum. Bir ildən çox çəkdi. Amma bundan sonra daha rahat olar".
Digər xəbərlər
