Nəhayət, Canluici Donnarummanın gələcəyi ilə bağlı söz-söhbətə son qoyulub. Onun “Mançester Siti”yə keçidi rəsmən açıqlanıb.

"Football-plus.az" xəbər verir ki, PSJ-nin qapıçısı karyerasını İngiltərə premyer-liqasında davam etdirəcək. İtaliyalı futbolçu artıq MS-nin üzvü sayılır.

Məşhur jurnalist Fabritsio Romanonun sosial şəbəkələrdə yaydığı məlumata görə, transferin məbləği 39 milyon avro təşkil edib. Bir müddət əvvəllər mediada Donnarummanın “Siti”də bonuslarla birlikdə ilə 15 milyon avroya qədər maaş ala biləcəyi iddia edilmişdi. Onun yeni klubu ilə bağladığı müqavilənin müddəti 2030-cu ilə qədər nəzərdə tutulub.

Canluici PSJ-yə 2021-ci ilin yayında “Milan”dan azad agent statusu ilə keçmişdi. Fransa klubu ilə müqaviləsinin müddəti bir ildən sonra başa çatacaqdı. Bir neçə həftə əvvəl tərəflər arasında aparılan danışıqlarda müqavilənin müddətinin uzatmaqla bağl razılıq əldə olunmadığı açıqlanmışdı.

Yeri gəlmişkən, Donnarumma ötən mövsüm bütün turnirlərdə 47 oyunda iştirak edib və 17 matçda qapısını toxunulmaz saxlayıb.

PSJ Arnau Tenası da satıb. 24 yaşlı qapıçı “Vilyarreal”a keçib. Onun yeni klubu ilə imzaladığı müqavilənin müddəti 2029-cu ilin yayına qədərdi. Daha əvvəl Tenasın transfer qiymətinin 2,5 milyon avro olacağı bildirilmişdi.

PSJ-ni Randal Kolo-Muani də tərk edib. O, karyerasını İngiltərə premyer-liqasında davam etdirəcək. Bu barədə Fabritsio Romano məlumat yayıb. Məşhur insayder “Tottenhem”in hücumçunu gələn ilin iyununa qədər PSJ- dən icarəyə götürdüyünü bildirib.

Qeyd edək ki, bir neçə həftə əvvəl PSJ-nin baş məşqçisi Luis Enrike Kolo-Muanini əvəzedici komandaya göndərmişdi. Randal ötən mövsümün ikinci yarısını icarə əsasında “Yuventus”da keçirib, A seriyasında 16 oyuna 8 qol vurub.