Nəhayət! İllərdi həsrətini çəkdiyimiz an gəlib çatdı!

Heç şübhəsiz, qəlbimiz sürətlə döyünür, ümidlər “Qarabağ”a bağlanıb, gözlər Bakının mərkəzində yerləşən Tofiq Bəhramov adına Respublika stadionuna dikilib. Hamı bir nəfər kimi ağdamlıların “Ferentsvaroş”la görüşünün necə nəticələnəcəyini gözləyir. Və hədəf birdi: Çempionlar Liqasının əsas mərhələsinə vəsiqə qazanmaq! Tarixi matça stadiondan şahidlik edə bilməyənlər isə “CBC Sport”un efirinə baxsın.

Çempionlar Liqası, pley-off, cavab oyunu
27 avqust
Qarabağ – Ferentsvaroş ( Macarıstan) 2:3
Leandro Andrade, 25. Abdulla Zubir, 45 - Lenni Cozef, 12. Barnabaş Varqa, 55-p. Tof, 81.
Hakimlər: KLEMAN TÜRPEN, Nikolya Danos, Aleksis Auqer, Romen Lissorq (hamısı Fransa).
VAR hakimi: Jerom Brisar (Fransa).
VAR hakiminin köməkçisi: Nikolya Renvil (Fransa).
Bakı, Tofiq Bəhramov adına Respublika stadionu. Saat 20.45.
İlk oyun – 3:1.

Əvvəlcə “Ferenstvaroş” haqda… Budapeşt təmsilçisi bu gün axşam saatlarında Bakıya təşrif buyuracaq. Məlum olduğu kimi, qonaqların heyətindən Julio Romao zədəlidi. Düzdü, son günlərdə bu siyahıya Bense Ötvös də qoşulmuşdu. Lakin dünən Macarıstan mətbuatında yayılan xəbərə görə, təcrübəli futbolçunun bərpa prosesi gözləniləndən daha sürətli gedib. Hətta o, komandanın oyunöncəsi son məşqində də iştirak edib. Macar həmkarlarımız Bensenin böyük həvəslə məşq etdiyini, oyunda forma geymək üçün çalışdığını bildirir. Pley-offun ilk oyununda onun ayaq biləyi burxulmuş və stadionu qoltuq ağacıyla tərk etmişdi. Hər halda, “yaşıl qartallar” gəlir. Özü də 20 azarkeşlə birgə. Azarkeş demişkən, “köhlən atlar”ın matç üçün satışa çıxardığı biletlərin qısa müddətdə tükənməsi macarların gözünü əməlli-başlı qorxudub. “Promotions.hu” saytı “Ferentsvaroş”u Bakıda cəhənnəm ab-havası gözlədiyini yazıbsa, “Magyar Nemzet” nəşri azərbaycanlı futbolsevərlərdən birinin “Bizi bir daha erməni komandası ilə qarışdırma! “Qarabağ” erməni klubu deyil, Azərbaycanın çempionudu!” şərhinə yer verib. Bildirilib ki, 30 mindən çox azərbaycanlı stadiona bayraqlarla gəlib “Ferentsvaroş”a dərs keçməyə çalışacaqlar. Bəli-bəli, məhz rəqibin məlum “texniki səhv”inə görə!

“Qarabağ”la bağlı hansısa problemdən isə bəhs etməyə dəyməz. Komandamızda cəzalı yoxdu. Yalnız Nəriman Axundzadə ilə bağlı cüzi narahatlıq var idi ki, onun da durumuna aydınlıq gəldi.

KƏNAN BAHADIR