“Qarabağ” sabah Çempionlar Liqasının pley-off oyununda “Ferentsvaroş”u qəbul edəcək.

Ənənəvi oyunöncəsi mətbuat konfransında macarların müdafiəçisi Ton Remakers media önünə çıxdı.

- Komandada əhval-ruhiyyə necədi? Birinci oyunda nə baş verdi ki, məğlub olduz?
- Çox yüksək. Fikirləşirəm ki, hər şey əladı. Bura bir məqsədlə gəlmişik ki, o da qalib gəlməkdi. Şanslarımızdan istifadə edə bilmədik. Fərdi səhvlərimiz oldu – xüsusilə də üçüncü qolda. Ümid etdiyimizdən fərqli oynadıq. Fokuslanmaq problemi oldu.

- Taktikanızla bağlı nə deyə bilərsiz?
- Komanda halında müdafiə olunmalıyıq, bir-birimizə kömək etməliyik. “Qarabağ”ın hücumlarının qarşısını alıb nəticə qazana bilərik.

Ardından baş məşqçi Robbi Kin jurnalistlərin suallarını cavabladı.

– Hazırlıqla bağlı nə deyə bilərsiniz?
– Kim oynayacaq, oynamayacaq ayrı məsələdi. Fiziki hazırlıq yerindədi.

- İlk “11-lik”də dəyişiklik olacaq?
– Ola bilər.

- İlk oyundakı hesab təsadüfi idi, yoxsa rəqibinizin haqqı idi?
– Başabaş oyun getdi. Rəqib fürsətləri daha yaxşı dəyərləndirdi. Müdafiədə səhvlərə yol verdik.

– 6 futbolçu milli komandaya gedəcək. Bu, sizə necə təsir edəcək?
– Bu bizim üçün yaxşı xəbərdi. Klubun inkişafından xəbər verir. Həmişə cavan oyunçulara şans verməyin tərəfdarıyam. Mənim işim oyunçuların inkişaına töhfə verməkdi. Bu, mənim üçün fəxrdi. Daha yaxşısı üçün əlimizdən gələni edirik. Yanvardan bəri 4 futbolçu milliyə dəvət olunub.

– Bakıdakı məşqi niyə ləğv etdiz? Sirli qutunu açmaq istəmirsiz?
– Həmişə bu suala cavab verirəm. Heç vaxt başqa stadionda məşq etmirəm. Bəlkə fikirləşirsiz ki, stadionlar eynidi. Amma biz həmişə öz stadionumuzda məşq edirik. Bizim məşqlərə baxmaq olar (binokl göstərir).

– “Liverpul”, “Tottenhem” kimi böyük klublarda oynamısız. Sabahkı oyunla bağlı həyəcan var?
– Bəli, “Milan”, “Liverpul” kimi böyük klublarda oynamışam. Futbolda hər şey mümkündü. Futbolçu olanda 2:0 uduzanda 3:2 etmişik. Sabah da hər şey ola bilər. Sabahkı oyunda da həyəcan var. Oyunçularımız da həyəcanlıdı. Bu mərhələni keçmək bizim üçün vacibdi. Baş məşqçi kimi həyəcan daha azdı.

– Həyəcanın olduğunu dediz. Bu, mənfi təsir etməz?
– Belə stadionda, belə oyunda həyəcanın olması normaldı. Bu olmasa, futbolçularım futbol oynaya bilməz.

– Taktiki gedişdə dəyişiklik ola bilər?
– Xeyr. Gözləmirəm ki, dəyişiklik olsun. Amma hər şey sürətlə dəyişə bilər.

– “Qarabağ”ı keçə bilməsəz, bunu normal qəbul edəcəksiz?
- Tam normaldı. Məğlub olmağı sevmirəm. Baş məşqçi olaraq, komandanı maksimum dərəcədə oyuna hazırlamışam. Mən heç vaxt “mən” olaraq yox, komanda olaraq fikirləşirəm.

- Nabi Keytanın vəziyyəti necədi?
– Geniş komandamız var. Hər kəsin oynamaq imkanı var. Əvəzləmələri görürsünüz, hər kəs oynaya bilər.

Qeyd edək ki, mətbuat konfransə nəzərdə tutulan vaxtdan 20 dəqiqə gec başladı.

MÜZƏFFƏR QULUZADƏ