Allah xeyir eləsin, “Zirə” yenə sirr dağarcığına dönüb, bu komanda ilə bağlı adi bir məqamı dəqiqləşdirmək üçün az qala İnterpola axtarış vermək lazım gəlir.

“Qartallar”ın heyətində Rafael Utziq ad-soyadlı bir futbolçu var idi, heç şübhəsiz, “Hayduk”la uğursuz oyunlarda onlara kömək edə bilərdi. Ancaq o braziliyalı ötən mövsüm bitən kimi başını götürüb qaçdı. Klubla futbolçu arasından qara, yoxsa sarı pişik keçdiyini bilmirik. Bildiyimiz odu ki, “Qarabağ”la iyunun 30-da keçirilən yoxlama oyununun ardından media önünə çıxan Rəşad Sadıqov “Utziq ayrılmaq istəyirdi, transferə çıxardıq. Utziq komandadan ayrılmasa, məşqlərə gəlmədiyi hər gün üçün ağır cərimə tətbiq olunacaq. Bu məsələyə hüquqi çərçivədə baxılır” dedi.

Sonra aydın oldu ki, baş məşqçi braziliyalını cərimələyib, dördhəftəlik əvəzedici komandaya göndərib. Dünən əvəzedicilər liqasında yeni mövsüm start götürdü. “Neftçi-2” ilə qarşılaşan “Zirə-2”in heyətində yenə Utziq görünmədi. “Football-plus.az” klubun mətbuat xidməti ilə əlaqə saxladıqda məlum oldu ki, artıq bir həftədi məşqlərə qatılmır. Bu isə intizamsızlığı yox, başqa klubla anlaşması ilə bağlıdı. Utqiz Çinə gedir. Futbolçu ilə klub arasında razılıq olsa da, “Zirə”nin də bunu təsdiqləməsi lazımdı.

MÜZƏFFƏR QULUZADƏ