Bu gün başqa telekanalların tamaşaçıları ekran qarşısına səsləməsi məsləhət deyil. Sadəcə, ona görə ki, böyük əksəriyyət “CBC Sport”da “Ferentsvaroş” – “Qarabağ” oyununa baxacaq.

Qarabağ erməni-rus işğalından azad olunandan sonra Azərbaycan cəmiyyətində inkişaf üçün milli ideya axtarışı gedir. Bir qədər qəribə görünsə və təəccüb doğursa da, deyəcəm: bu gün ən cəlbedici milli ideyalardan biri də “Qarabağ”ın avrokuboklarda, özəlliklə də Çempionlar Liqasında keçirdiyi oyunlardı. Belə günlərdə ölkədə futbolla maraqlanan da, maraqlanmayan da “Qarabağ” bayrağı altında birləşir, komandanın uğuru və ya uğursuzluğu müzakirələrin axarını müəyyənləşdirir. Əlbəttə, ölkəmiz müntəzəm bu turnirin əsas mərhələlərində təmsil olunsaydı, təkcə “Qarabağ” yox, başqa komandalar da qitənin ən güclüləri ilə gücünü sınasaydı (kalambur alındı...), ağdamlılar bu qədər populyar, diqqət mərkəzində olmazdı. Amma iş elə gətirib ki, bu gün avropalıların önünə çıxası bircə komandamız var. “Qarabağ”ın simasını əcnəbilər-legionerlər müəyyənləşdirsə də, bütövlükdə Azərbaycan brendidi. Ən azı toponimin doğmalığına, “sükan arxasında” azərbaycanlı məşqçinin dayanmasına görə.

Azərbaycan klubları üçün avrokuboklarda mübarizə çox tez başa çatır. Ya rəqibi düz təhlil etmirlər, ya qarşılarına nisbətən güclü komanda çıxır, ya da hansısa başqa subyektiv amil üzündən təslim olurlar. Reallıq budu ki, payız gəlməmiş əlləri ətəklərindən uzaq, başıaşağı-üzüsulu Misli premyer-liqasına dönürlər, bu ekosistemdə, orqanik-doğma mühitdə yaşayıb-yaratmağa, yəni qol vurmağa çalışırlar.

“Qarabağ” isə futbolda pilləli, zəncirvari inkişafın mümkünlüyünə dair ən parlaq nümunələrdən biridi. Əvvəllər qrupa düşmək futbolumuz üçün möcüzə sayılırdı. Qurban bəy bunu vərdiş halına gətirdi. Sonra düşüncə belə oldu ki, qrupa düşmək azdı, ordan çıxmaq da lazımdı. Qurban bəy buna da “yox” demədi, komandanı 2021/22-də Konfrans Liqasının, 2023/24-də Avropa Liqasının qrupundan çıxardı. İndi isə yeni sosial-ictimai sifariş var: “Qarabağ” ÇL-in əsas mərhələsinə qalmalıdı!

Gözəl sifarişdi və mən də onun altına həvəslə imza atmağa hazıram. Ancaq ədalət naminə özümüzə bu sualı da verməliyik: bu çempionatda mübarizə aparan, faktiki heç bir rəqabətlə üzləşmədən, sona bir neçə tur qalmış çempionluğu təmin edən komandanın özündən ikiqat varlı rəqibi sıradan çıxarması nə dərəcədə qanunauyğundu? Təbii ki, qanunauyğun deyil!

Mən azərbaycanlı azarkeşlərin “Qarabağ”ı “Ferentsvaroş”dan üstün görmək istəyini anlayır, onları dəstəkləyirəm. Amma bunu tələb halına salmaq bir qədər qəribə görünür. Öz aramızdı, “Qarabağ” “Ferentsvaroş”dan nədə üstündü? Büdcəsinə, marka dəyərinə, oyunçuların səviyyəsinə, yarışdığı çempionatın gücünə, yoxsa nəyə görə üstündü? Təbii ki, heç bir ağlabatan dəlil yoxdu. Hə, 2022-ci ilin avqustundan qalan xoş xatirələrimiz, qələbə sevincimiz var. Onda evdə 1:1 ilə kifayətlənən Azərbaycan çempionu səfərdə Çerçesovun “Ferentsvaroş”unu dizini yerə qoymaqla Avropanı heyrətləndirmişdi. Onda “Qarabağ” daha güclü idi, amma Macarıstan çempionunu devirmək şansı aşağı dəyərləndirilirdi. İndi komanda üç il əvvəlkindən zəifdi, ancaq ondan uğur gözləyənlərin sayı daha çoxdu. Qəribədi, deyilmi? Əlbəttə, bu sualı verənlər də tapılacaq: nəyə əsasən o “Qarabağ”ın indikindən güclü olduğunu düşünürsən? Onda Kadi ilə Zubirin parlaq dönəmi idi, üstəlik Qurbanovun əlinin altında Ramil Şeydayev, İbrahima Vaci və Ovusu Kvabena var idi. Təkcə elə adları indikilərlə müqayisə etmək kifayətdi.

Amma mən yenə də təslimçi əhval-ruhiyyədə olmağın tərəfdarı deyiləm. “Ferentsvaroş”u keçmək üçün 30-40 faiz şansımız varsa, bundan da yararlanmaq lazımdı. Budapeştdəki oyun üçün minimum vəzifə uduzmamaq və ya ən pis halda minimal fərqlə qayıtmaqdı. Evdə - 30 min azarkeşin önündə macarların işini bitirmək olar. Ona görə ki, evdə divarlar da kömək edir.

Hə, yazının sonuna gəlib çatmışıqsa, mən də “Qarabağ”a “Ferentsvaroş”u ud” deyənlərin sırasına qoşula bilərəm. Amma bu tələb yox, xahişdi. “Qarabağ” Azərbaycan futbol ictimaiyyəti üçün 8 illik fasilədən sonra ÇL-in əsas mərhələsində yer almaq çox önəmlidi. Uda bilirsənsə, ud da! Bacarırsansa, ud da! İstəyirsən, xahiş kimi qəbul et, istəyirsən, tələb kimi: amma ud da, ud!

HUŞƏNG